Destinasjon Sápmi AS, mii lea sámi mátkemearrefitnodat sámi mátkeealáhusaid várás, lea ožžon 500 000 ruvnnu doarjaga Sámedikkis. Doarjja galgá buoridit mátke- ja galledanealáhusaid gánnáhahttivuođa, ja dahkat Sámi nannoseabbo, ceavzileabbo ja eanet ovddasvástideaddji mátkemearrin.

– Destinasjon Sápmi lea fálaldat maid Sámi mátkeealáhusaktevrrat leat guhká vuordán, mii earret eará galgá čuovvulit ovddeš Johtit-áŋgiruššama fierpmádagaid. Sámedikkis lea doaivva ahte Destinasjon Sápmi lea «rievttes málle» sámi mátkeealáhusaid dárbbuid dustemii, mii maid seammás veahkeha sihkkarastit ovdáneami mii sámi servodagaide lea ávkin, dadjá sámediggepresideanta Silje Karine Muotka (NSR).

Sámediggi atná erenoamáš dehálažžan ahte Destinasjon Sápmi oažžu vejolašvuođa fuolahit ja ovdánahttit sámi mátkeealáhusaid iežas eavttuid vuođul. Dat mearkkaša ahte sáhttá váikkuhit dasa ahte fitnodagain lea eaiggátvuohta ja gelbbolašvuohta mii sihkkarastá iežas gullevašvuođa ja guoddevaš mátkeealáhusaid boahttevaš buolvvaide.

Sámediggi čuovvula Destinasjon Sámi ovttas mielruhtadeddjiin Romssa ja Finnmárkku fylkkasuohkaniin, ovddasvástideaddji stáhtalaš eiseválddiiguin ja maiddái eará relevánta ovttasbargoguimmiiguin.

Doarju fitnodaga ja konsearttaid mat buoridit ássanmovtta
Inkeri Laitinen produksjoner AS lea ožžon 40 000 ruvnnu doarjaga Sámedikkis. Doarjja sáhttá nannet fitnodaga ruđalaččat ja veahkehit lágidit kvalitehtakonsearttaid ja čájálmasaid báikkálaččat Deanus ja Finnmárkkus, ja mátkkošteddjiide, ja dat nanne ássanmovtta.

– Prošeavttat maid Inkeri Laitinen áigu čađahit, geassekonsearttat ja báikkálaš biepmu guossoheapmi, dahket ahte báikkálaš dáiddáriin, musihkkariin ja turistafitnodagain lea bargu. Lea dehálaš ahte gávdnojit iešguđetlágan kulturfálaldagat ja doaimmat mat duddjojit positivitehta ja ássanmovtta báikegottis. Seammás dát sáhtášii leat kvalitehtasihkkarastojuvvon fálaldat mii lea illun olles guvlui ja maiddái mátkkošteddjiide, ja mii sáhttá buoridit fitnodagaid dietnasa, dadjá Muotka.

Doarju neahttagávppi guoddevaš sámi duoji ja designa várás
Muzet design AS Kárášjogas lea Sámedikkis ožžon 60 000 ruvdnosaš doarjaga neahttagávppi ásaheapmái, mii vuovdá sámi duoji ja designa ja deattuha sirkulára designa ja ávnnasválljema.

– Dálá áiggis lea dehálaš ovddidit guoddevaš sámi designa ja buktagiid. Neahttagávpi oainnusmahttá ja čohkke aktevrraid mat ovddidit sámi designa ja duoji guoddevaš, árbevirolaš ja innovatiiva vuogi mielde. Mu mielas lea dá buorre čoavddus vai smávva ja hearkkes, muhto kvalitehtadiđolaš fitnodagat mat dovdet iežaset ehtalaš ovddasvástádusa, olahit márkanii, dadjá Muotka.

Jus leat gažaldagat dahje áiggut jearahallat, váldde oktavuođa politihkalaš ráđđeaddiin Anne Toril Eriksen Baltoin tlf: +47 413 10 027, anne.toril.eriksen.balto@samediggi.no dahje politihkalaš ráđđeaddiin John Mathis Utsiin tlf: +47 951 75 908, john.mathis.utsi@samediggi.no