Girku SOS lea mielde máŋgga sámi fierpmádagas, ja sis lea oktavuohta ollu organisašuvnnaiguin. Birrasat leat smávvát ja bieđggui, muhto sis lea oktasaš mihtomearri. Go čoahkkanit stuorát fierpmádahkii gos buohkat oahpásmuvvet, de buorrána beaktilvuohta ja ovttasbargu.

Girku SOS pláne lágidit konferánssa golggotmánus/skábmamánus 2024:s Romssas, čohkken dihtii buot almmolaš, priváhta ja eaktodáhtolaš organisašuvnnaid mat barget sámi álbmotdearvvašvuođain main lea guovddážis psyhkalaš dearvvašvuođaváttut ja iešsorbmen.

Áiggi mielde lea plána čohkket buot bálvalusaid ovtta vuođđovuogádahkii, gos sámi álbmot álkibut gávdná makkár fálaldagat gávdojit miehtá Sámi iešguđet sámegillii.

– Sámediggái lea iešsorbmen eastadanbargu Sámis dehálaš, ja mii oaidnit ahte lea ávkkálaš ovttas bargat dán suorggis. Lea buorre go Girku SOS vuolggaha barggu čohkket áigeguovdilis aktevrraid mat guovdilastet iešsorbmen eastadeami ja psyhkalašdearvvašvuođaváttuid. Lea maiddái dehálaš ahte lea davviriikkalaš sámi ovttasbargu dán suorggis, ja dasa bidjá ge Girku SOS návccaid, dadjá sámediggeráđđi Runar Myrnes Balto (NSR).

Doarjaga lea juolludan Dearvvašvuohta, fuolahus- ja mánáidsuodjalusprošeavttaid doarjjaortnet.