Interreg-prošeavtta Lohkanlihkku ulbmil lea ráhkadit dutkanvuđot doaimmalaš digitála oahppanbirrasa davvi-, lulli-, julev-, nuortalaš- ja anárašsámegielaid lohkan- ja čállinoahpahusa várás sámi skuvllaide. Lohkanlihkku lea reaidu man vehkiin váhnemat ja oahpaheaddjit sáhttet doarjut mánáid lohkan- ja čállingálggaid, ja dán reaiddu sáhttet maiddái boarráset oahppit, geain leat lohkan- ja čállinhástalusat, geavahit. Dainna reaidduin sáhttá lasihit mánáid lohkanmovtta, mii fas váikkuha máná ollislašoahppamii ja skuvlaolahusaide.

– Sámi mánát fertejit dál geavahit váldogielat digitála lohkan- ja čállinreaidduid, go sámegielat digitála reaiddut váilot, nu ahte lea máilmmi buorre go dát galgá dál ráhkaduvvot, dadjá sámediggeráđđi Maren Benedicte Nystad Storslett (NSR).

Sámediggeráđi mihttomearri lea fuolahit ahte gávdnojit alladássásaš digitála oahpponeavvut ja oahpporesurssat, ja movttiidahttit ráhkadit eanet julev- ja lullisámi oahpponeavvuid. Danne addojuvvo 500 000 ruvdnosaš doarjja doarjjaortnegis Doarjja Interregii. Doarjjaortnega ulbmil lea buoret árvoháhkan Sámis ja eanet ovttasbargu riikarájáid rastá Sámis. Doarjaga eaktu lea ahte ožžot Interregas dohkkeheami.

Dát lea stuorra prošeakta oktiibuot 4,2 miljon ruvnno ovddas Norgga bealde. Doarjja Interregii lea dábálaččat ráddjejuvvon 200 000 ruvdnui, muhto prošeavttain mat erenoamážit váikkuhit Sámedikki ulbmilolaheami sáhttá loktet doarjaga 500 000 ruvdnui.

– Mii leat ilus go sáhttit doarjut prošeavtta ja sávvat ahte dat nannešii sámi mánáid ja nuoraid lohkan- ja čállinmovtta, dadjá sámediggeráđđi Maja Kristine Jåma (NSR).

Interreg Aurora lea eurohpalaš Interreg-ovttasbargoprográmma rájáidrasttideaddji ovttasbargui 2021-2027. Prográmma addá buriid vejolašvuođaid ođđa ja gelddolaš ovttasbargui rádjaguovlluin gaskal Ruoŧa, Suoma, Norgga ja Sámi.