Berit Marie P. E. Eira Árvu/Sametinget

Sámediggeráđđi Berit Marie P. E. Eira (JsL) lea duhtavaš go Sámediggi doarjaga addima bokte sáhttá doarjut dakkár doaibmabijuid man geažil sáhttá duođaštit eanet bohccuid maid boraspiret leat goddán.

Eira muitala ahte guohtunealáhusain leat odne stuorra váttisvuođat go boraspiret goddet guohtonelliid. Vahágiid duođašteapmi lea okta stuorámus hástalusain boraspirehálddašeamis.

– Eallu lea veaiddalasas birra jagi. Go ráppiid leat gávdnan, de lea dávjá mannan nu guhkes áigi ahte lea váttis duođaštit ahte lea go boraspire goddán bohcco. Doarjja mii lea addon veahkeha duođaštit eanet bohccuid boraspirevahágin ja dat čuovvu daid vuoruhemiid maid Sámediggi lea dahkan boazodoallodoarjaga ektui, dadjá Eira.

Prošeavtta ulbmil lea lasihit dietnasa dainna lágiin ahte geahpedit beaivválaš goluid ja duođaštit eanet bohccuid maid boraspiret leat goddán. Dasa lassin livččii ulbmilin buorebut gaskkustit árbevirolaš máhtu boahttevaš buolvvaide. Doarjja galgá geavahuvvot oastit reaidduid boazodoallodoaimmaide.

Ulbmil lea duođaštit eanet bohccuid maid boraspiret goddet. Vai lea álkit gávdnat ráppiid maid boraspiret leat goddán, de lea rusttegiin stuorra ávki. Jus lea skohterbarta maid sáhttá geasehit, de sáhttá leat ealu luhtte olu eanet. Dasa lassin veahkeha termalaš kiikar, GPS-sáddenrusttegat ja dronat gávdnat ráppiid jođáneappot ja dávjjit maid boraspiret leat goddán.

Lea dehálaš gávdnat ráppiid ovdalgo eará eallit borret daid, vai sáhttá oažžut Stáhta luonddubearráigeahču duođaštit/dokumenteret ahte boraspiret dat leat goddán daid. Buhtadus bohccuid ovddas maid ráfáidahttojuvvon boraspiret leat goddán lea vuosttažettiin rehkenaston dan mielde man ollu bohccuid nagoda duođaštit goddon ráfáidahttojuvvon boraspiriin.