Mihkkal N Somby lea aitto álggahuvvon fitnodat, gos váldoulbmil lea ásahit ja viiddidit nana ja gánnáhahtti fitnodaga. Mihkkal N Somby fitnodat oažžu doarjaga investeret galmmihanrusttegiid.  

Fitnodaga váldoulbmil lea ásahit ja viiddidit nana ja gánnáhahtti fitnodaga mii lea spesialiserejuvvon buvttadit ja vuovdit guhkesáigásaččat vurkkoduvvon bohccospihkebierggu, mas lea erenoamáš máistu ja kvalitehta. 

Mihkkal N Somby oaidná dárbbašlažžan viiddidit doaimma galmmihanrusttegiiguin  viidáset doaimma ja ovdánahttima várás. Dákkár doaibmabijut sáhttet buvttadit eanet buktagiid ja ovddidit fitnodagaid boazodoalus.  

– Buvttaovddideapmi mas lea bohccobiergu vuođđun, mii lea nu dearvvašlaš, lea dehálaš ja mielddisbuktá buoret vejolašvuođaid árvohuksemii. Sámediggi doarju áŋgiruššamiid báikkálaš borramušain ja álgoálbmogiid árbedieđuin, ja šaddá gelddolaš čuovvut fitnodaga ovdáneami viidáseappot, dadjá sámediggepresideanta Silje Karine Muotka (NSR).  

Doarjja juolluduvvo Boazodoalu lassiealáhusa doarjjaortnega bokte.