Áigodagas golggotmánu 27.b.- juovlamánu 22.b. dán jagi čájeha Tegnerforbundet vuosttaš retrospektiiva čájáhusa sámi dáiddáriin Ánddir Ivvár Ivváriin, Iver Jåksain, Oslos. Čájáhus deattuha Jåksa tevnnegiid mat eai leat ovdal čájehuvvon almmolaččat. Golbma sámi dáiddára Laila Labba, Niillas Helander ja Kurt Hermansen váikkuhit čájáhussii ođđa buktagiiguin mat gulahallet Jåksa dáiddalašvuođain.

Dáinna daguin háliida Tegnerforbudet čatnat Iver Jåksa dálá dálááiggedáidagii. Iver Jåks lea vuosttažettiin dovddus su grafihkain, su čuollamiiguin ja installašuvnnaiguin, muhto ávdnasiid gaskkas maid Jåks guđii ledje olu tevnnegat. Dát tevnnegat čájehit maid Jåksa barggu govdodaga.

– Dát čájáhus lea mielde lokteme Iver Jåksa eará perspektiivii, seammás go ovdanbuktá máŋga nuorra sámi dáiddára seamma prošeavttas, juoga man liikon hui bures doarjut, dadjá Maja Kristine Jåma (NSR).

Hanne Hammer Stien ja Kristoffer Dolmen leaba kuráhtorat čájáhusas ja ovttasbargaba máŋgasiiguin čájáhusa gaskkustanbarggus. Earret eará galgá fágaseminára Arkiteaktamuseas, Oslo Sámiid Duodji doallá duodjeeahkediid Tegnerforbudes, ja Laila Labba ja Marte Lill Somby galgaba doallat gaskkustanprošeavtta mánáide ja nuoraide Tegnerforbudas. Dasa lassin lea gaskkustanšiehtadus dahkkon Oslo sámi skuvllain čájáhusáigodagas.

– Lea buorre ovdamearka čuovvuleapmái movt Tegnerforbudet čatná alcces eará sámi organisašuvnnaid ja ásahusaid ja ovttasbargá olahan dihte sámi dáidaga nu olusiidda go vejolaš, dadjá Jåma.

200 000 ruvdnosaš doarjja lea juolluduvvon doarjjaortnegis Kulturdoaibmabijut.

Gažaldagaid dahje jearahallama addá sámediggeráđđi Maja Kristine Jåma (NSR), mob +47 984 87 576, maja.kristine.jåma@samediggi.no