Elin Kåven ja su fitnodat Gollebeaivi AS oažžu doarjaga ovddidit ođđa kulturkonseapta. Konseaptta ulbmilin lea fievrridit boares árbevieruid ođđaáigásaš árgabeaivái. 

Fiktiivvalaš govain "Den arktiske alven" áigu son hábmet máilmmi gos mánát ja nuorat besset oahpásmuvvat sámi árbevieruiguin ja eallinoainnuiguin ođđaáigásaš reaidduid, girjjálašvuođa ja spealuid bokte. 

– Sámi sisdoallu, erenoamážit mánáide ja nuoraide dain lávddiin gos sii leat, lea váilevaš. Danne lea buorre ahte Sámediggi sáhttá doarjut dákkár prošeavttaid mat sáhttet leat mielde ovddideamen máhtolašvuođa kreatiivvalaččat, dadjá sámediggepresideantta Silje Karine Muotka (NSR). 

Doarjja lea juolluduvvon Sámi mátkeealáhus, hutkkálaš ealáhusat ja sámi borramuš doarjjaortnega bokte.