Kulturdoaibmabijuid doarjjaortnega bokte juolluda Sámediggi doarjaga gitta 162 000 ruvnno rádjai kulturfabrihkkii FabKirk AS ja Røverstaden klubben AS:i. Áigumuš lea lágidit konsearttaid gos sámevuohta lea oidnosis. 

Ođđa álggahuvvon kulturfabrihkka FabKirk AS oažžu gitta 82 000 ruvnno rádjai doarjaga sin prošektii mii galgá nannet mánáid ja nuoraid sámi identitehta ja gullevašvuođa. FabKirk áigu bálkkáhit sámi artisttaid nuvttá konsertii mánáid ja nuoraid váras Kirkonjárggas. FabKirk ulbmil lea fállat kulturgaskkusteami mánáide ja nuoraide.

Klubben i Røverstaden AS oažžu gitta 80 000 ruvnno rádjai doarjaga čađahit sin “Nordaførr 2025” nammasaš prošeavtta. Sii áigot bálkkáhit sámi artisttaid Nordaførr 2025 unnafestiválii Oslos, mas lea fokus sámi ja Davvi-Norgga kultuvrii. Nordaførr ulbmil lea earret eará boktit beroštumi ja sáhkkiivuođa sámi kultuvrii, ja seammás doaibmat sámi servodaga arenan ja deaivvadanbáikin.

– Hui somá go háliidit ovddidit ja oainnusmahttit sámi giela ja kultuvrra! Mii leat rámis go beassat leat mielde doarjumin prošeavttaid mat ovddidit min kultuvra ja identitehta. Dákkár doaibmabijut leat dehálačča dasa ahte seailluhit ja nannet sámi kultuvrra boahttevaš buolvvaide, dadjá sámediggeráđđi Ole-Henrik Bjørkmo Lifjell (NSR).