Doarjjaortnega Kulturdoaimmat bokte lea sámediggeráđđi cuoŋománus juolludan oktiibuot 1 046 400 ruvnno 13 iešguđet ohccái, iešguđet lágan kulturdoaimmaide.

Earret eará ožžot guokte filmma doarjaga; Screaming Fox Production AS Guovdageainnus oažžu 200 000 ruvnno doarjjan Suvi West filbmii Máttaráhkká, ja Aurinko Film AS Guohcanuoris oažžu 100 000 ruvnno doarjjan Samisk Skyteskive filbmii.

Vårscenefest Romsa oažžu 190 000 ruvnno doarjjan 2026 Vårscenefest rahpančájálmassii, man Sámi Lávddi lahtut lea ráhkadan Auri Ahola láidesteami vuolde, ja mas vuođđun lea čájálmas Ávvu.

Katarina Lisa dáiddaprošeakta Nesoddenis oažžu 110 000 ruvnno prošeaktaruhtan ja doarjjan mánáiddáiddaprošektii Elliid Luottat - Dyrenes spor. Sii galget ovdánahttit ja čađahit čájálmasa mii lea heivehuvvon mánáide gaskal 3-5 jagi. Čájálmasa ulbmil lea ahte mánát galget oahpásmuvvat davviguovllu elliid eallimii, ja daid eanadagaide mat leat nu dehálaččat daid eallinvugiide. 

Ante Johan Buljo - AJAB DUODJI Guovdageainnus oažžu 95 000 ruvnno doarjjan čohkket, dokumenteret ja systematiseret árbedieđuid bealljegoađi huksemis ja geavaheamis Lákkovuonbađa, Álttá ja Guovdajohtolaga siiddaid guovlluin Guovdageainnus.

Dáid lassin ožžot vel gávcci eará kulturprošeavtta doarjaga.

Paul Bendikk Jåma Árvu/Sámediggi

– Mii háliidat álohii leat mielde váikkuheamen ahte sámi kultuvra sihke seailluhuvvo, ovddiduvvo ja gaskkustuvvo ođđa ulbmiljoavkkuide. Lea hui buorre go sámi kultuvra čájehuvvo iešguđet oktavuođain ja arenain, lohká sámediggeráđđi Paul Bendikk Jåma (NSR).

Doarjjaortnega mihttomearri lea ahte sámi dáidda ja kultureallin ovddiduvvo ja gaskkustuvvo sámi dáiddabuvttademiiguin ja kulturvásáhusaiguin.

Áigemearri ohcat doarjaga kulturdoaimmaide lea skábmamánu 3. beaivvi 2026 dii. 15.30. Ohcamušat meannuduvvojit dađistaga.

Dát ožžot doarjaga: