Doarjja kulturgaskkusteapmái ja márkanfievrrideapmáiSámediggeráđđi lea juolludan oktiibuot badjel 300.000 ruvnno guovtti prošektii sámi mátkeealáhus, hutkkálaš ealáhusat ja sámi borramuš doarjjaortnega bokte. Sámediggeráđđi addá 196 000 ruvdnosaš doarjaga Sami camp AS:i, Ivgobađas, hukset ja rusttegahttit Skibotn hotell restaurántta ja lávddi gaskkustan dihtii sámi kultuvrra. Doarjja veahkeha maiddái fitnodaga váldit vuostá eanet gussiid.– Lea buorre go mátkeealáhus čalmmustahttá sámi kultuvrra ja go láhčá dili dan dahkat iežas fitnodagas, nu go Sami Camp AS Davvi-Romssas ja Ivgobađas. Mii leat ilus go sáhttit doarjut doaimma mii lea mielde lokteme fitnodaga guosseloguid, kvalitehta ja erenoamážiid dietnasa, dadjá sámediggepresideanta Silje Karine Muotka (NSR).Sámediggeráđđi addá 105 000 ruvdnosaš doarjaga Opplev Finnmark AS:i čađahit TV-buvttadeami ovttas eará unnit mátkeealáhusfitnodagaiguin ja ealáhusaiguin Finnmárkkus.Opplev Finnmark AS láigoha viessobiillaid ja oahpista turisttaid guovllus. Sii leat álggahan ráiddu mátkkošteami birra Finnmárkkus, mii báddejuvvui geassemánus ja maid Naturkanal 1 lea buvttadan. Lea searveruhtadanprošeakta ovttas 17 eará mátkeealáhusfitnodagain ja báikkálaš fitnodagain miehtá Finnmárkku, márkanfievrridan dihtii guovllu ja fitnodagaid.– Midjiide lea somá doarjut ealáhuseallima Sámis dakkár prošeavttain mii buktá ovttasbarggu ja dietnasa guovllu mátkeealáhussii. Dán prošeavtta doarjumiin mii láhčit dili guovllu mátkeealáhussii ovdánit ja oažžut guhkit ja birgenvejolaš áigodagaid, dadjá sámediggepresideanta Silje Karine Muotka (NSR). Almmuhuvvon 19.08.2024 14.14 Maŋemusat rievdaduvvon 19.08.2024 14.15