Visit Reindeer-konseaptta bokte vuoruha Ájddo AS kulturturismma, mas sámi kultuvrra ja bohccuid gaskkusteapmi lea dat mii galgá geasuhit turisttaid. Sin máhttu lea vuođđuduvvon Pavall-bearrašii, geat máŋga buolvva leat bargan boazodoaluin Bådåddjos, Fuosskos ja Fuoldás Duokta orohagas.

Fitnodat áigu cegget gárddi turismaulbmilii, ja dáinna lágiin sihkkarastit ekonomalaš sihkarvuođa dainna lágiin ahte oažžut lassi sisaboađu galledeaddjiturismma bokte. Boazogárdi ceggejuvvo Feriekolonien A/S eatnamii, mii lea sin ovttasbargoguoibmi ja mii earret eará lea guossedállu 4H:i ja maiddái doaimmaha Ut-på-vidda.

– Turisma Sámis lea ovdáneaddji ealáhus ja das lea stuorra potensiála. Lean ilus go Sámediggi sáhttá veahkkin loktet smávva fitnodagaid nu ahte dat sáhttet čađahit iežaset prošeavttaid, dadjá sámediggepresideanta Silje Karine Muotka (NSR).

158 000 ruvdnosaš doarjja addojuvvo doarjjaortnegis lasseealáhus boazodoalus. Ortnega mihttomearri lea lasihit fitnodagaid logu ja lasihit dietnasa doaimmain main boazodoallu lea vuođđun. Ortnegis lea rabas ohcanáigemearri gitta skábmamánu 3. beaivái 2025 diibmu 15.30.