Dolin AS áigu ásahit gelddolaš fálaldaga mas mihttun lea ovddidit ja buvttadit geasuheaddji buktagiid bohccobierggus ja vuovdit njuolga geavahusmárkanii. Buktagiid vuođđun leat sámi báikedoalloárbevierut, ja dat galget heivehuvvot ođđaáiggi geavaheaddjedárbbuide.

Sámediggepresideanta Silje Karine Muotka (NSR) lea hui duhtavaš dainna ahte Sámediggi ruhtadoarjagiin sáhttá leat veahkkin doarjume lotnolasealáhusdoaimma Guovdageainnus.

Dolin AS eaiggáduššá Áslat Máhtte Gaup, gii fitnodaga jođiheami lassin bargá boazodoalus.

Dolin AS oaččui 2018:s 169 000 ruvnno álggahandoarjjan Sámedikkis, ovdánahttináigái ovdal fitnodaga ásaheami.

– Álggahandoarjja lea addán Áslat Máhtte Gaupii buori vuođu mannat viidáseappot fitnodaga ásahemiin, ja mun lean hui duhtavaš dainna ahte Sámediggi dál lea addán sutnje doarjaga háhkamii, nu ahte fitnodat beassá boahtit johtui buvttademiin, dadjá sámediggepresideanta.

315 000 ruvdnosaš doarjja addo doarjjaortnegis Máŋggabealálaš ealáhusat. Dán jagi vuoruhuvvojit earret eará doaibmabijut mat mealgadit addet ođđa háhkama ja fitnodatovddideami, ja doaibmabijut mat nannejit ealáhusaid main lea vejolašvuohta stuorrut ja lasidit bargosajiid, nu ahte olmmošlohku/fárren lassána.

Jearahallama addá sámediggepresideanta Silje Karine Muotka (NSR), silje.karine.muotka@samediggi.no