«Elle ja Májjá máibmi» lea digitála jietnagirjeráidu podkástahámis smávvamánáide. Juohke oasis leat sullii 10 minuhta guhku fearánat bussáčivggaid Elle ja Májjá ja iešguđege dáhpáhusaid birra maid soai vásiheaba. Lea gehppes ja álkis giella, ja ulbmil lea stimuleret mánáid iežaset govahallannávcca guldaleami bokte. Dál lea Guldal Rec ožžon 200 000 ruvnno doarjjan almmuhit nuppi sesoŋŋa jietnagirjeráiddus.
– Lea nu dehálaš ahte ráhkaduvvojit podkásttat ja jietnagirjjit sámi mánáide. Dát lea joavku mii álkit jávká daid olu jietnagirjjiid ja podkásttaid gaskkas rávisolbmuide, dadjá sámediggeráđđi Maja Kristine Jåma (NSR).
Juolludeapmi addo doarjjaortnegis Doarjja sámi girjjálašvuođa prošeaktadoarjagii. Doarjjaortnega mihttomearri lea sámi girjjálašvuohta mii lea olámuttos sámegillii, ja doarjjaortnegis lea rabas ohcanáigemearri gitta juovlamánu 1. beaivvi rádjai.
Sámi dáiddakollektiivva Dáiddadálu logi jagi ávvudeami oktavuođas lea rámiduvvon sámi dáiddár Maret Anne Sara ráhkadan stuora dáidaga mii lea buohkaide Guovdageainnus olámuttos. Dáidda lea plánejuvvon ovttasbarggus Dáiddadáluin, Guovdageainnu suohkaniin, mátkeealáhusprošeavttain Guovdageainnus, Ovddos AS:in ja KORO:in, ja dat lea darvehuvvon Guovdageainnu suohkanviesu olgoseaidnái. Dát dahká ahte dáidda lea oidnosis E45-geainnus, seammás go dáidda lea maid das báikkálašálbmogii. Mihttu lea ahte dáidda galgá váikkuhit dasa ahte lea geasuheaddji servodat álbmogii ja ealáhusaide, ja seammás bovdet gaskkusteapmái ja ođđasisjurddašeapmái.
– Lea hui unnán sámi dáidda mii herve almmolaš viesuid Sámis. Dane lea illudahtti go lea vuolggahuvvon dákkár jurdda ahte sámi dáiddár Maret Anne Sara dáidda boahtá oidnosii Guovdageainnu ássiide ja gallejeddjiide, dadjá Jåma.
Doarjja addo doarjjaortnegis Kulturdoaibmabijut. Doarjjaortnega mihttomearri lea buorit rámmaeavttut sámi dáiddabuvttademiide ja kulturvásáhusaide, ja ortnegis lea rabas ohcanáigemearri gitta skábmamánu 1. beaivái 2023.
– Áiggun geavahit liibba ávžžuhit olbmuid ohcat doarjaga Sámedikki doarjjaortnegiin, dadjá Jåma.