Sámi mátkeealáhusa, hutkás ealáhusa ja sámi borramuš doarjjaortnega bokte lea Sámediggeráđđi juolludan 497 000 ruvnno doarjjan golmma ohccái geat háliidit čalmmustahttit sámi ja kvena kultuvrra iežaset prošeavttaid bokte.

– Prošeavttat mat dál ožžot doarjaga, ovddastit dehálaš barggu nannet sámi ja kvena oassálastima mátkeealáhusain, seammás go láhčet dili árvoháhkamii ja doaimmaide báikegottiin, dadjá sámediggepresideantta Silje Karine Muotka (NSR).

Alpehuset Benonisen oažžu 222 000 ruvnno álggahit ođđa mátkeealáhusfitnodaga Go arctic tours, Moskaluovttas Romssa suohkanis. Ohcci oažžu doarjaga čađahit vuođđobargguid ja cegget lávu ja bassingoađi. Go arctic tours áigot fállat vásáhusaid gos várit, vuotna ja mearrasámi kultuvra deaivvadit.

Lyngen Vista AS: 175 000 ruvnno čalmmustahttit sámi ja kvena dáidaga, duoji ja kulturárbbi regiovnnas. Ovttasbarggu bokte báikkálaš dáiddáriiguin ja buvttadeddjiiguin galgá prošeakta váikkuhit buoret márkanvejolašvuođa allaárvosaš buktagiidde, nannet kulturgaskkusteami ja bistevaš árvoháhkama báikkálaš servodagas.

Mollisjok Lodge AS: 100 000 ruvnno hukset ođđa ja nanus šalddi vuolit-Mollešjogas, go boares šaldi gaikojuvvui gollama ja sihkkarvuođa hástalusaid geažil. Ulbmil ođđa šalddiin lea sihkkarastit beassama dehálaš guovlluide bivddu, guolásteami, boazodoalu ja turismma dáfus, ja buoridit fievrridanoktavuođaid báikkálaš olbmuide ja ealáhusdoaimmaide.