Maja Kristine Jåma Árvu/Sametinget

Prošeakta galgá duođaštit ja oččodit čállojuvvot mearrasámi terminologiija smávvafatnasiidda, ja earenoamážit klinkafanasterminologiija. Mihttomearrin lea buvttadit gaskkustanávdnasiid mat galget leat olahahttit digitálalaččat resursan buohkaide geat háliidit eanet dieđuid klinkafanasárbevieru birra, ii dušše mearrasámi guovlluin, muhto davvisámi giellaguovllus oppalaččat. Forbundet Kysten galgá ovttasbargat Mearrasiiddain dán prošeavttas.

– Mearrasámi fanasárbevierru ja terminologiija lea eahpeávnnaslaš máhttu maid lea deaŧalaš buorebut suodjalit ja gaskkustit, ja mun lean ilus go oainnán ahte guokte beali main lea buorre gelbbolašvuohta dán árbevierus ovttasbarget. Forbundet Kysten lea eaktodáhtolaš kultursuodjalanorganisašuvdna man ulbmil lea suodjalit rittu kulturárbbi, maiddái mearrasámi, ja Mearrasiida lea fágalaččat gelbbolaš ovttasbargoguoibmi, dadjá sámediggeráđđi Maja Kristine Jåma (NSR).

Gaskkustanávdnasiid márkanfievrredeapmi galgá dahkkot mearrasámi ásahusaid, relevánta skuvllaid ja mánáidgárddiid bokte, ja maiddái galgá leat gávdnamis Forbundet Kysten ruovttusiidduin.

– Dát prošeakta lea ávkkálaš servodahkii, ii dušše min bulvii, muhto maiddái boahttevaš buolvvaide, dadjá Jåma.