Doarjja nuppástuhttimii koronapandemiija geažil

Doarjja nuppástuhttimii koronapandemiija geažil

Koronapandemiija geažil lea Sámediggeráđđi juolludan 112.000 ru doarjaga mátkeealáhusfitnodahkii Arctic Panorama Lodge Skjervøy suohkanis. Ruđat galget geavahuvvot mátkeealáhusdoaimma nuppástuhttimii riikkaidgaskasaš márkanis Norgga ja skandinávalaš márkanii.  

Arctic Panorama Lodge AS fállá idjadeami, borramuša ja vásihusaid riikkaidgaskasaš márkanii.  
 
Koronapandemiija geažil lea sin márkan jávkan. Fitnodat jáhkká ahte olgoriikkalaš márkan ii boađe ruovttoluotta dán jagi iige vel vuosttaš jahkebealis boahtte jagi ge. Searvi háliida danne heivehit ja fállat iežas buktagiid Norgga ja skandinávalaš márkanii go dat rahppojuvvo. Dát šaddá veaháš earálágan márkkan mii fitnodagas lea leamaš dán rádjai, man geažil ferte ođasmahttit sihke márkanfievrridanávdnasiid, dáláš buktagiid ja buvttaovddideami.  

– Ohcanprošeavttas lea sáhka doaimma nuppástuhttimis riikkaidgaskasaš márkanis Norgga/skandinávalaš márkanii koronadávdda geažil. Min árvvoštallama mielde dávista doaibmabidju Sámedikki koronadoaibmabijuide ealáhuseallima várás, dadjá sámediggeráđđi Silje Karine Muotka (NSR). 

Fitnodat háliida fállat eanet árjjalaš luomu juksan dihtii Norgga márkanii. Danne háliidit sii fállat ođđa buktagiid lassin dáláš buktagiidda nugo idjadeami, borramuša, vánddardanmátkkiid ofelaččain ja dan haga ja fanasmátkkiid.  

– Koronapandemiija geažil oaidná Sámediggi ahte dárbbašuvvojit sierra doaibmabijut ealáhuseallimii. Fitnodagat ja suorggit maidda dávda lea erenoamážit čuohcan vuoruhuvvojit. Dáid searvvis leat mátkeealáhusat ja erenoamážit vásihusealáhusat. Ollu fitnodagat fertejit nuppástuhttit dili ođđa árgabeaivái korona geažil, fertejit gávdnat ođđa márkaniid, ođđa juohkinčovdosiid ja ođđa vugiid movt organiseret doaimmaset. Fitnodagaid nuppástuhttindárbu, nuppástuhttinplána ja čađahandáidu árvvoštallojuvvojit doarjaga juolludettiin, dadjá Silje Karine Muotka loahpas. 

Eanet dieđuid ja jearahallama addá sámediggeráđđi Silje Karine Muotka (NSR) +47 984 87 576, dahje e-poasta: silje.karine.muotka@samediggi.no