– Sámediggeráđđi lea positiivvalaš dasa go boanddat ovttasbarget, ja erenoamážit go juogadit reaidduid ja mašiinnaid. Mii diehtit ahte mášiinnaid oastin eanadollui leat stuora investeremat, ja jus mii sámediggeráđis sáhttit boanddaid veahkehit dahkat dakkár investeremiid, de mii searvat dasa, dadjá sámediggeráđđi Berit Marie Eira (JSL).

Frank Halvar Valø orru Ivgumuotkis. Ivgu suohkan gullá Sámedikki ealáhusdoarjagiid doaibmaguvlui, ja danne lea ge vejolaš doarjut fitnodaga.

89 250 ruvdnosaš doarjja lea oassin hárvva oastima ruhtadeamis. Dákkár hárvvas maid Valø áigu oastit leat jorba niibbit mat jorret ja lutkejit eatnama, ovdamearkka dihte ovdal gilvima. Hárven dáhpáhuvvá maŋŋil go eana lea veltejuvvon.

Prošeavtta ulbmil lea lasihit ovttasbarggu boanddaid gaskka ja nannet ovttasdoaibmama ealáhusdoaimmaheddjiid gaskka. Valø čállá ohcamušas, ahte reaidduid juogadeapmi maiddái nanne ovttaskas doaluid ekonomiija, buorida ovttasbarggu doaluid gaskka ja addá orrunmovtta.

Kallfare Redskapssamarbeid ovttasbargu lea álggahuvvon gaskkal Frank Valø, Øystein Fossmo ja Trond-Martin Dahl.

89 250 ruvdnosaš doarjja juolluduvvo Eanadoalu, gilvvagárdegeavaheami ja meahccegeavaheami doarjjaortnegis.