Dag Runar Wollvik og Eva Katarina Niva Privat foto

Wollvik ja Niva oamasteaba Vatnegården šibitdálu Fiervvás (Samuelsberg), Gáivuonas ja sudnos lea mielke- ja biergobuvttadeapmi. Sudnos leat maid sávzzat maid gohčodit gammelnorsk spælsau, ja ivguheasttat.

Dál áiguba Wollvik ja Niva rievdadit mielkebuvttadeami, eret hiŋgaliin ja diktit šibihiid leat luovus návehis. Danne áiguba rievdadit náveha ja hukset ođđa vistti mielkegusaide. Dáinna huksemiin olaheaba daid gáibádusaid mat biddjojit návetdoalus, ja divodeamit álkidit šibitdolliid bargodili.

– Lea dárbu sihke hukset ođđa oasi ja divodit dálá náveha, vai Wollvik ja Niva beassaba ovdánahttit ja lasihit doaimmaid, dadjá sámediggepresideanta Silje Karine Muotka (NSR).

Muotka lea duhtavaš go Sámediggi beassá dáinna doarjagiin ovdánahttit Vatnegården návetdoaimma Davvi-Romssas.

Prošeavtta lea maid Innovašuvdna Norga ruhtadan.

– Mii leat duhtavaččat go sáhttit ruhtadit dán ovttas Innovašuvdna Norggain. Boađus ovttasbarggus lea ahte mii nagodat ovttas ovdánahttit sámeguovllus eanandoalu, dadjá sámediggepresideanta.

Doarjja oahppomátkái

Sámediggeráđđi lea maid juolludan 75 000 ruvnnu Kárášjoga ja Guovdageainnu boanddaid servviide. Sii galget oahppomátkái Irlándii, oahppan dihte Irlándda eanandoallopolitihkas ja mo EU váikkuha dán guovllu šibitdolliide. Ohcci lea Norges Bondelag.

Dákkár oahppomátki sáhttá leat ávkin ođasmahttimiin, inspirašuvdnan ja loktet gelbbolašvuođa.

– Sihke Guovdageainnus ja Kárášjogas leat guhkes gaskkat šibitdáluid gaska ja eanandolliid lohku lea njiedjan, báhcán leat velá moadde smávva šibitdoalu. Danne lea dehálaš doalahit eanandolliid dán guovtti suohkanis ja oahppomátki sáhttá leat fágalaččat ávkin ja rekrutteremii, dadjá sámediggepresideanta.

Mátki lea borgemánus ja mihttun lea oahppat eanet biepmobuvttadeamis ja mo sáhttá heivehit eanandoalu ja turismma.

Goappašat doarjagat juolluduvvojit doarjjaortnegis Vuođđoealáhusat – Eanadoallu, gilvvagárdegeavaheapmi ja meahccegeavaheapmi.