250 000 ruvdno addojuvvo Saemien Sijte ja Kystens arv -musea gaskasaš ovttasbargoprošektii, «Lullisámi fanasárbevierru», mii galgá čohkket árbevirolaš dieđuid ja dokumenteret boares sámi fatnasiid.

Norgga álbmotmusea oažžu 250 000 ruvnno doarjjan «Samiske tradisjonsbåter i museumssamlinger» -prošektii, mas galget kártet sámi fatnasiid museačoakkáldagain ovttasbarggu bokte sámi ásahusaiguin. 

– Sámediggi áŋgiruššá seailluhit máhtu fanasduddjoma ja -geavaheami birra, mii lea dehálaš oassi min kulturárbbis. Lea buorre go mii sáhttit doarjut prošeavttaid mat áigot registreret ja dokumenteret dán historjjá, dadjá sámediggeráđđi Runar Myrnes Balto (NSR).

Máhttu sámi fatnasiid ja fanashuksema birra lea leamaš unnán. Jagis 1944 bolde dahje vuodjudedje buot sámi fatnasiid Davvi-Romssas ja Finnmárkkus, ja dan rájes leat massán ollu fatnasiid, juogo mihcamárdola alde dahje go leat mieskan mearragáddái. 

– Dá lea Sámedikki áŋgiruššama álgu ásahit sámi fanassuodjaleami. Sámediggi lea dan dihte bovden miehtá riikka birrasiid sámi fanasgáhttenčoahkkaneapmái Hársttáide skábmamánu loahpageahčen. Doppe juogadat mii fágamáhtu ja digaštallat geainnu viidáseappot, loahpaha sámediggeráđđi Myrnes Balto (NSR).