Jon Vidar Persenis lea oapmedállu Ráissas, mas sus leat sihke sávzzat maid biebmá dálvvi ja njamaheaddji gusat. Oamit guhtot meahcis eanas geasi ja muđui jagis daid biebmá suinniiguin. Lea smávit báikkálaš oapmedállu – ja eanas biergu vuvdojuvvo njuolga dálus maŋŋel njuovvama.  

Ođđa vistti huksema oktavuođas lea áigumuš lasihit omiid ja dasto buvttadeami. Elliide šaddá buoret dilli ođđa návehis ja doallu beavttálmahttojuvvo. Investeren lea oassi dálu viidáseappot ovddideamis, ja seammás dat nanne biebmobuvttadeami guovllus gos eanandoalus leat guhkes árbevierut.

– Lea buorre go mii sáhttit doarjut doaimmaid mat láhčet ealáhussii vejolašvuođa ovdánit. Boanda beassá eambbo buvttadit go oažžu ođđa náveha, ja dat sáhttá buoridit olles doalu ekonomiija, dadjá sámediggeráđđi Elisabeth Erke (Gb).

Doarjja juolluduvvo Sámedikki doarjjaortnegis eanandoalu, gilvvagárdedoalu ja vuovdedoalu várás.