Oassin stuora dálááiggedáiddačájáhusas Veneziabiennálas 2022:s álggahuvvui prošeakta, mii gohčoduvvui Sámi Kick-off kuráhtorprošeakta. Mihttomearri lei čohkket sámi kulturolbmuid geain lea beroštupmi bargat kuráhtorin, nu ahte sáhtáše ohcat šaddat oassin Veneziabiennálas. Kuráhtor lea dakkár gii pláne, buvttada, gaskkusta ja čađaha čájáhusaid, dávjá bargá museain ja galleriijain.

Gávcci oasseváldi válljejuvvojedje oassálastit ja dat gávccis galget dál šaddat oassin viiddiduvvon sámi kuráhtorprográmma ovdánahttimis. Prográmma galgá fágaidrasttideaddji ovttasbargu norgga, ruoŧa ja suoma bealde Sámis, namalassii ásahusaid Sámi Dáiddaguovddáža (SDG), Sámi allaskuvlla, University of Lapland, RiddoDuottarMuseaid (RDM), Konstfrämjandet Norrbotten, People's Movement for Art Promotion ja Norrbotten and Curera gaskkas.

– Sámi kuráhtorat leat guhká váilon. Sámediggeráđi dieđáhus visuála dáidaga birra lea gávnnahan ahte lea dárbu alitoahpahussii gos oahppá eanet sámi dáidaga birra, ja kuráhtoroahpahussii, dadjá sámediggeráđđi Maja Kristine Jåma (NSR), gii lea hui duđavaš go prošeavttas lea buorre fágalaš vuođđu nanu institušuvnnain riikkarájáid rastá measta olles Sámis.

Guhkitáigge mihttu lea álggahit ja ovddidit sámi kuráhtorprográmma, man Sámi allaskuvla sáhttá álggahit dahje váldit badjelasas. Prošeavtta oktavuođas galgá fágagirji čállojuvvot, man sáhtášii atnit maid maŋŋel go prošeakta lea loahpahuvvon.

300 000 ruvdnosaš doarjja lea juolluduvvon ortnegis ásahusovddideapmi. Prošeakta heive máŋggaid vuoruhemiide ortnegis, earret eará vuoruheapmái Fágalaš ovttasbargoprošeavttat ásahusaid gaskkas. Heive maid vuoruheapmái Prošeavttat main lea mihttu ovdánahttit ásahusa fágalaččat, ja maiddái guhkit áigái vuoruheapmái Prošeavttat mat váikkuhit dáidaga ja kultuvrra gaskkusteapmái ođđa vugiid mielde.

Gažaldagaid dahje jearahallama addá sámediggeráđđi Maja Kristine Jåma (NSR), mob. +47 472 42 366, maja.kristine.jama@samediggi.no