Mázejoavkku ovddeš lanjaid Mázes Guovdageainnu suohkanis eaiggáduššá dál dáiddársearvi Máze Giehtadáidu, mii earret eará áigu heivehit dálá lanjaid visttis daidda dárbbuide mat boahtteáiggi dáiddárresideanssas leat. Ovdaprošeavttas galget maiddái leat dárboanalysa ja ohcamiid ovddideapmi váldoprošeavtta várás.

Sámediggeráđđi oaivvilda ahte prošeavttas sáhttá šaddat stuora mearkkašupmi sámi dáiddáriidda, dasa lassin ahte das maiddái šaddá stuora mearkkašupmi riikkaidgaskasaččat.

– Boahttevaš dáiddárguovddáš/dáiddárresideansa Mázes mearkkašivččii ollu sámi dáiddárbirrasii, ja maiddái riikkaidgaskasaččat álgoálbmotovttasbarggus eará álgoálbmogiid dáiddárjoavkkuiguin. Searvi lea ásahuvvon báikkálaš doaibman mas lea riikkaidgaskasaš doaibmaguovlu, ja vuolggasadji lea Mázes, dadjá sámediggepresideanta Silje Karine Muotka (NSR).

Ovdaprošeakta lea maid ožžon doarjaga Arena - Norgga kulturráđis ja Guovdageainnu suohkanis.

150 000 ruvdnosaš doarjja juolluduvvo regionálaovddidanprošeavttaid doarjjaortnegis, mas lea rabas ohcanáigi gitta skábmamánu 1. beaivvi 2023 rádjai. Doarjjaortnega ulbmilin lea árjjalaš ja ulbmildiđolaš ovttasbargu regionála ja báikkálaš eiseválddiiguin nannen ja ovddidan dihtii sámi kultuvrra, giela ja servodateallima.