Lullisámi dearvvašvuođafierpmádat háliida ovddidit álbmotdearvvašvuođa ja eallinhálddašeami sihke sámi ja majoritehta mánáid/nuoraid gaskkas dakko bokte ahte guorahallat ja vásihit sámi kulturmuittuid Tydal suohkanis ja Selbu suohkanis. 

Kulturvánddardeami, historjámuitalusaid, ságastallanjoavkkuid ja olgodoaimmaid bokte galget mánát ja nuorat oažžut reflekteret sámi kulturárbbi, dearvvašvuođa, identitehta, gullevašvuođa ja hálddašeami birra. Seammás galget doaimmat veahkehit nannet searvevuođa ja doarjut sihke fysalaš ja psyhkalaš dearvvašvuođa. 

– Dát lea buorre prošeakta mii láhčá dili ságastallamiidda ja digaštallamiidda olggobealdili, givssideami ja psykososiála dearvvašvuođa birra. Doaivumis dát sáhttá buoridit áddejumi ja unnidit givssideami ja loavkidemiid sámi mánáid ja nuoraid vuostá. Dákkár áŋgiruššama mii dárbbašat buoridan dihte skuvlla ja servodaga bajásšaddanbirrasa, lohká sámediggeráđđi Runar Myrnes Balto (NSR).