Silje Karine Muotka Åse M. P. Pulk / Sametinget

Guovdageainnu historjásearvi háliida ráhkadit vuogádaga man bokte oainnusmahttet máhtu ja dieđu sámiid meahcceávkkástallama birra.

Prošeavttas áigot ovdánahttit metodologiija mainna dokumenterejit ja kártejit dieđuid sámiid meahcceávkkástallama birra. Dan bokte háliidit ráhkadit ja ásahit digitála vurkkodan- ja gaskkustanlávddi / áppa máhtu váste, vai sisdoalu sáhttá čájehit buori vuogi mielde, ja mii sáhttá fátmmastit historjjálaš ja kultuvrralaš sajiid/báikkiid Guovdageainnu suohkanis.

– Sáhttá leat olles Sápmái ávkin go dokumenterejit ja kártejit dieđuid sámiid meahcceávkkástallama birra, ja šaddá somá oaidnit dán pilohtaprošeavtta bohtosa, dadjá sámediggepresideanta Silje Karine Muotka (NSR).

Pilohtaprošektii gullá maid ehtalaš njuolggadusaid hábmen, vai olbmot sáhttet oadjebasat juogadit iežaset dieđuid ja máhtu.

Doarjja lea juolluduvvon regionála ovddideami doarjjaortnegis prošektii mas kártejit, vurkejit ja gaskkustit dieđuid meahcceávkkástallama birra.

Doarjja juolluduvvo regionála ovddidanprošeavttaid doarjjaortnegis, prošektii mas kártejit, vurkejit ja gaskkustit dieđuid

Dán prošeavtta ovttasbargooasálaččat leat Sámi allaskuvla, Sámi joatkkaskuvla ja boazodoalloskuvla, Guovdageainnu gilišillju ja Guovdageainnu Meahcceguovddáš.