– Prošeakta soahpá sámediggeráđi álggahanjulggaštussii Beaiveálgu, mas mii áigut sihkkarastit ealli báikegottiid, gos giella, kultuvra ja ealáhusat ožžot ahtanuššanvejolašvuođaid, dadjá sámediggepresideanta Silje Karine Muotka (NSR).

Prošeavtta ulbmil lea ásahit viidáseappot nanu vuoruheami maŋŋá ássanmiellaprošeavtta maid Finnmárkku Spábbačiekčanbiire lea čađahan maŋemus jagiid. Juolludeapmi lea dán jahkái ja guđa ođđa gildii: Álttá, Láhpi, Ákŋoluovtta, Várggáid, Čáhcesullo ja Gáŋgaviikka gielddaide.

Galget lágiduvvot doalut nugo ealáhusseminárat, olgoáibmoskuvla luonddu- ja árbevierromáhtus, organisašuvdnaovddideami fágaeahkedat, spábbačiekčanbeaivi mas leat juohkelágan doaimmat, márkanbeaivi, johtolatsihkkarvuođabeaivi skuvllain ja nuvttá iđitborramuš gieldda ássiide.

– Sámediggi oaidná ulbmillažžan doarjut prošeavtta doaibmabidjun dan ektui ahte váikkuhit positiivvalaš ealáhusovdáneapmái ja jorgalahttit eretfárrema boaittobeale báikkiin sámi guovlluin Finnmárkkus. Dasa lassin lea dákkár prošeakta mielde eastadeame sámevaši guhkit áigge vuollái. Dat doaibmá áddejupmehuksejeaddjin ja deaivvadanbáikin buohkaide geat leat mielde, ja unnida maid vuostálasvuođaid, dadjá sámediggepresideanta.

Doarjja juolluduvvo regionálaovddidanprošeavttaid doarjjaortnega bokte, mas lea rabas ohcanáigi gitta skábmamánu 1. b. 2023 rádjai. Doarjjaortnega mihttomearri lea árjjalaš ja ulbmildiđolaš ovttasbargu regionála ja báikkálaš eiseválddiiguin nannen ja ovddidan dihtii sámi kultuvrra, giela ja servodateallima.