Nye Salangen-Nyheter háliida prošeavttain “Trygg samisk ungdom i Sør-Troms” ahte sámi mánát ja nuorat galget dovdat gullevašvuođa ja oadjebasvuođa searvevuođas. Nye Salangen-Nyheter háliida iežas podcast/neahtta-TV formáhtain mii lea oaivvilduvvon nuoraide, leat mielde positiivvalaččat čalmmustahttimin sámi nuoraid Ástavierddas. Fáttát mat galget gieđahallojuvvot prográmmain, lea givssideapmi ja sámevašši.  

– Lea hirbmat deaŧalaš dakkár doaibmabijut mat sáhttet veahkehit olbmuid dovdat oadjebasvuođa ja čeavláivuođa iežaset sámi identitehtas sihke dál ja boahtteáiggis. Mii doaivut ahte prošeakta sáhttá váikkuhit dakkár servodaga gos sámi nuorat besset bajásšaddat givssideami ja sámevaši balu haga, lohká sámediggeráđđi Runar Myrnes Balto (NSR). 

Doarjja juolluduvvo doarjjaortnega Givssideami ja sámevaši eastadeami bokte.