– Filbma «Tystnaden i Sápmi – ikke lenger stille» lea tabuáššiid birra, ja dat lea dehálaš filbma. Lea mávssolaš addit olbmuide máhtu seksuálalaš illastemiid birra eastadeami dihte ja guottuid rievdadeami dihte, dadjá sámediggeráđđi Runar Myrnes Balto (NSR).
Filbma ja prošeakta váldá ovdan seksuála rohcošemiid ja mentála dearvvašvuođa, ja jaskatvuođa dáid birra sámi servodagas. Prošeavtta mihttun lea rievdadit jávohisvuođakultuvrra dakko bokte ahte oažžut johtui ságastallama nuoraidbirrasis, dearvvašvuođabargiid gaskkas ja vuosttašlinjábálvalusas, ja maiddái servodagas muđui. Golggotmánu 11. beaivvi lea filmmas vuosttaščájálmas Álttás ja prošeavtta álggaheapmi.
Paranord Film AS áigu publihkkii addit máhtu seksuálalaš illastemiid ja psyhkalaš dearvvašvuođa birra, ja dáinna lágiin vejolašvuođa leat mielde eastadeame ja rievdadeame boahtteáiggi ipmárdusa, rabasvuođa ja gulahallama bokte. Sámedikki doarjagiin ožžot vejolašvuođa galledit eanet sámi guovlluid ja bidjat fokusa jávohisvuođakultuvrii seksuálalaš illastemiid birra sámi servodagain.
– Lea positiiva ahte Paranord Film AS oaidná dárbbu olahit stuorát publihka ja ráhkadit čuovvolandoaimmaid filbmii mii sáhttá olahit govda publihka, earret eará nuoraid ja dearvvašvuođabargiid, dadjá Myrnes Balto.
Filbma, maid Liselotte Wajstedt lea rešisseren, gieđahallá tabuaid ja dáhpáhusaid mat leat givssidan olu nuorra sápmelaččaid – máŋgga buolvvas. Nuorra nissonolbmot Marion Anne Mienna Rimpi ja Ida Labba Persson muitaleaba iežaska vásáhusaid birra filmmas.
Paranord Film AS ovttasbargá prošeavttas earret eará organisašuvnnain Mental Helse ja SÁNAG:iin - (Sámi našuvnnalaš gealbobálvalus – psyhkalaš dearvvašvuođasuddjen ja gárrendilledikšu). Dáinna lágiin hukse Paranord Film AS lágideami filmma birra mii lea nanus fágalaččat, ja go kombinere fágalaš beali filmma čájehemiin, de olahit stuorát oasi mihttojoavkkus go maid muđui livčče dahkan.
Jearahallama addá dahje vástida gažaldagaide sámediggeráđđi Runar Myrnes Balto (NSR), +47 977 73 778, runar.myrnes.balto@samediggi.no