Prošeakta lea ovttasbargu gaskal Tjihkkon almmudahka ja Duaddara ráfe – bidumsáme giella- ja kultuvvraguovdátj. 

Prošeavtta ulbmil lea álggos almmuhit Qvigstada sátnelisttuid julev- ja bihtánsámeguovlluin. Qvigstad iežas giehtačállon teavsttat ja giellageahččaleamit galget transkriberejuvvot ja analyserejuvvot, ja sirdojuvvot dálá čállinvuohkái. Sátnelisttut galget maiddái almmuhuvvot elektrovnnalaš hámis. Prošeakta galgá maiddái duođaštit sániid ja dajaldagaid mat eai leat vel duođaštuvvon. Sátnelistu galgá čalmmustahttit suopmanerohusaid ja giellarievdamiid.  

– Jus galgá leat vejolaš ovddidit ja nannet erenoamážit julevsámegiela ja bihtánsámegiela, de lea dehálaš ahte gávdnojit čálalaš gáldut maid servodat sáhttá geavahit dán barggus, dadjá sámediggeráđđi Mikkel Eskil Mikkelsen (NSR).  

Sámediggeráđđi lea ilus go sáhttá doarjut prošeavtta, dan sivas go lea stuorra dárbu geavahišgoahtit sániid ja dajaldagaid julev- ja bihtánsámegillii.  

– Ovddeš sániid ja dadjanvugiid transkriberen lea erenoamáš dehálaš bihtánsámegillii danne go bihtánsámegillii dál eai báljo gávdno čálalaš gáldut. Sátnegirjjit mat almmuhuvvojit almmolaččat leat dehálaččat go áigut nannet áitojuvvon sámegielaid, dadjá sámediggeráđđi Mikkelsen.  

134 000 ruvdnosaš doarjja addojuvvo Duođaštandoaibmabijuid doarjjaortnegis.