Ovddos AS oažžu doarjaga prošektii Nannet - resurssa- ja ráđđeaddiguovddáža ásaheapmái boazodoalu várás, masa sii leat maiddái ovdal ožžon doarjaga Sámedikkis.  

Prošeavtta ulbmil lea buoridit ovttasbarggu boazodoalloealáhusas ja doarjut orohagaid sin barggus juridihkalaš doaimmaiguin siiddain. 

– Dá lea dehálaš prošeakta mainna Ovddos AS bargá, ja prošeavtta ulbmilat čuvvot doarjjaortnega vuoruhemiid. Prošeavttas leat buorit áigumušat, ja mii oaidnit ahte lea dárbu dákkár fálaldahkii. Prošeakta veahkeha bidjat johtui ja hukset ovttasdoaibmama siskkáldasat, dasa lassin nannet gelbbolašvuođa siskkáldasat boazodoalus ja olgguldasat ealáhusa birra, dadjá sámediggepresideantta Silje Karine Muotka (NSR). 

Guovdageainnu suohkan oamasta Ovddos AS mii bargá fitnodatovddidanprošeavttaiguin, ovttasbargoprošeavttaiguin ja máhttobuorideaddji doaibmabijuiguin.