Sámediggi addá 250 000 ruvnno doarjaga Dáiddadállu AS:i ja 250 000 ruvnno Riddu Riđđu Festivála AS:i sin oktasaš prošektii. Sii áigot ásahit oktasaš riikkaidgaskasaš eksportakantuvrra ja doaimmahaga sámi dáidagii, man Dáiddadállu AS ja Riddu Riđđu Festivála AS eaiggáduššet.

Ole-Henrik Bjørkmo Lifjell Ørjan Marakatt Bertelsen

Eksportakantuvra galgá doaibmat profeššunealla ja vuoigatvuođaide vuođđuduvvon struktuvran sámi dáidaga gaskkusteamis riikkaidgaskasaččat. Dasa lassin dat galgá vuođđuduvvot sámi árvvuide.

– Guovddáš bealli ásaheamis lea ahte eksportakantuvra galgá jođihuvvot bargiin geain lea sámi gelbbolašvuohta. Mii lea dehálaš ahte sámi dáiddárat ožžot doarjaga joavkkus mii dovdá sámi kultuvrra, árvvuid ja ovdanbuktinvugiid, ja mii fuolaha ahte sámevuohta vuhtiiváldojuvvo olles proseassas, lohká sámediggeráđđi Ole-Henrik Bjørkmo Lifjell (NSR).

Ulbmil lea sihkkarastit sámi dáidagii nannosit sajádaga riikkaidgaskasaččat, seammás go láhčá diliid ekonomalaš ahtanuššamii ja dáiddalaš ovdáneapmái Sámis.

– Prošeakta lea dehálaš sámi dáidaga ja kultuvrra nannemii. Dat láhčá sámi dáiddáriidda buoret vejolašvuođa olahit olbmuide máilmmiviidosaččat, ja veahkeha ovddidit ja nannet sámi dáidaga ja kultuvrra, dadjá sámediggeráđđelahttu.

Prošeakta almmuhuvvo riikkaidgaskasaččat Máret Ánne Sara čájáhusa rahpama oktavuođas Turbine Hallas Tate Modern museas, Londonis golggotmánus 2025.