Prošeakta RomsaDál galgá oainnusmahttit sámegiela ja sámi kultuvrra Romssa gávpogis, ja veahkkin eastadit sámevaši ja árgabeaiverasismma sámevuođa positiivvalaččat oainnusmahttima bokte. Prošeavtta mihttun lea sámegiela ja sámi kultuvrra oainnusmahttima bokte lávdadit Romssa rámisvuođa sámi gávpogin.

RomsaDál lea dássážii čađahan máŋggaid lágidemiid mánáide ja nuoraide, ja leat leamaš máŋggat ovttasbarggut festiválaiguin, skuvllaiguin, universitehtain ja earáiguin Romssas. Ovdamearkka dihte almmuhuvvo dál sámegillii TIL ruovttučiekčamiin Alfheim spábbačiekčanšiljus. Seamma dahkko maiddái vuolit dásiin, ovttas Romssa spábbačiekčanbiiriin.

– Lea hirbmat buorre doaibmabidju. Jurddaš man buorre bajásšaddat dainna ahte lea seamma lunddolaš gullat sámegiela jienaalideaddjerusttegiin go dárogiela. Diekkár álkes, muhto seammás beaktilis, doaibmabijut eastadit sámevaši boahtteáiggis leat mávssolaččat, dadjá sámediggeráđđi Runar Myrnes Balto (NSR).

RomsaDál viidáset ovddideami váldomihttun lea gávnnahit movt prošeakta galgá organiserejuvvot ja movt dat sáhttá sajáiduhttot vel eanet Romsa ealáhuseallimis. Dasa lassin leat bargame dainna movt RomsaDál sáhtášii šaddat bissovaš doaibman boahtteáiggis, iige prošeaktadásis jođihuvvot, nu go dál.

RomsaDál lea juo leamaš mielde fuomášuhttime báikkálaš servodaga sámevaši ja árgabeaivevealaheami birra, muhto dáhpáhusat mat bohtet ovdan medias čájehit ahte lea ain bargu mii ferte dahkkot.

– Jus dát prošeakta sáhttá dagahit oalgeváikkuhusaid maiddái olggobealde Romssa, de lea das buorre servodatlaš ávki Sápmái, ja mus lea stuora doaivva ahte dahká dan, dadjá Myrnes Balto.

Sámediggeráđđi juolludii diibmá 260 000 ruvnno RomsaDál-prošektii.  96 250 ruvdnosaš doarjja prošeavtta viidásetfievrredeapmái juolluduvvo doarjjaortnegis Doarjja regionálaovddidanprošeavttaide.

Jearahallama addá dahje vástida gažaldagaide sámediggeráđđi Runar Myrnes Balto (NSR), +47 977 73 778, runar.myrnes.balto@samediggi.no