​

Silje Karine Muotka Máret Inger A. Anti / Sámediggi

Sámediggepresideanta Silje Karine Muotka (NSR) deattuha ahte Gába nammasaš gápmagiid vuovdaleapmi lea innovatiivvalaš prošeakta mas lea ollislaš jurddašeapmi etihka, gierdogeavaekonomiija ja sámi árbevieruid hárrái.

– Dá leat árvvut mas Sámediggi berošta ja maid háliida doarjut. Lean positiivva dasa ahte "Gába" vuovdaleapmi olahivččii stuorát márkanii ja čalmmustahtášii álgoálbmotmáhtu, dadjá Muotka.

Gápmagiid árbevirolaš buvttadanproseassa gaskkustuvvo filmma bokte olahan dihte vuovdima stuorát márkanii. Prošeakta ovddida buktagiid bohcco liigebuktagiin, nugo sisttis ja náhkis, ja viidáset gaskkusta sámi giela ja árbedieđu.

Mihttun lea buvttadit vihtta 5-10 minuhtasaš oanehisfilmma, mat čájehit olles proseassa bohcco válljemis gitta gárvves buktagii. Filmmat galget addit ipmárdusa proseassain nugo gávlumis ja gaccašteamis, sáltemis, neaskimis, ostemis ja goarrumis.

Dát vihtta filmma biddjojuvvojit oktii oahpistemiin guoddevašvuođa ja buvttadeami birra ja badjeolbmo holisttalaš jurddašanvuogi birra olles bohcco ávkkástallama, válljema ja ávdnasiid geavaheami hárrái, mas buot ferte dahkkojuvvot rievttes vuogi mielde.

Sihke oanehisfilmmat ja ollislaš filbma galget leat áibbas guovddážis «Gába boots» almmuheamis ja promoteremis, ja galget muitalit buktaga historjjá. Ámmátrešissevrrat galget gaskkustit «Gába» mearkabuktaga, mii mearkkaša čeahpes nissonolmmoš davvisámegillii.

Doarjja juolluduvvo doarjjaortnegis sámi mátkeealáhus, hutkás ealáhusat ja sámi borramuš.