Maja Kristine Jåma Árvu/Sametinget

Guokte girjji leat 8. ja 9. girjji ráiddus Niila ja Ádegáhttu maid Jens Martin Mienna lea čállán. Niila ja Ádegáhttu girjeráidu lea leamaš hui miellagiddevaš mánáide, danin go son čállá erenoamáš ja geasuheaddji vugiin mii váldojuvvo bures vuostá. Čálli lea maiddái fitnan lohkamin girjjiid Sámis earret eará mánáidgárddiin, ja sus leat iešguđetlágan vuogit mo lohkat ja heivehit ulbmiljovkui.

-Niila ja Ádegáhttu máilbmi lea oahpis mánáide, ja lea somá oaidnit ahte girjjit leat nu bivnnuhat. Danne illudahttá go sáhttit addit doarjaga ođđa mánáidgirjjiide čállon Miennas, ja ahte ilbmá eanet mánáidgirjjálašvuohta sámegillii, dadjá sámediggeráđđi Maja Kristine Jåma (NSR).

Sámediggi lea maid addán doarjaga Bárus SA:i almmuhit girjji geres duoji birra - mo ráhkadit geresa. Girjjis leat govat ja válddahallan olles proseassas movt ráhkadit geresa. Girjji sáhttá geavahit oahppogirjin duodjefágas, ja heive maiddái earáide geat beroštit fáttás.

Juolludeamit leat addon Sámedikki doarjjaortnega bokte Doarjja sámi girjjálašvuođa prošeaktadoarjagii.