Tjihkkom Almmudahka oažžu 111 000 ruvdnosaš doarjaga jorgalit "Diary of a Wimpy Kid" julevsámegillii. Girjeráidu lea bivnnuhis girjeráidu 10-15 jahkásaš mánáide, mii lea jorgaluvvon máŋgga gillii dan rájes go vuosttaš ilmmai eŋgelasgillii jagi 2007:s.

Girjeráidu lea Greg Heffley birra, su ustibiid ja váhnemiid birra. Greg niegada šaddat beakkánin. Girjeráidu čuovvu su mánnávuođa rájes dassážii go olle pubertehtaahkái mas lea festen, čihkalasat, nieiddat ja miellačájeheapmi.

– Tjihkkom Almmudahka lea maŋemus jagiid erenoamážit jorgalan ja almmuhan girjjiid julevsámegillii. Fáddá dán girjjis guoská hui ollu nuoraide dien agis, beroškeahttá gos máilmmis sii leat, nu ahte lea buorre go dat dál šaddá eanet girjjálašvuohta nuoraide olámuttos julevsámegillii, dadjá sámediggeráđđi Maja Kristine Jåma (NSR).

Trøndelága fylkkasuohkan oažžu 570 000 ruvnno gávcci fysalaš girjji jorgaleapmái, ja logi videogirjji jorgaleapmái. Trøndelága fylkkasuohkan, oktan fylkkagirjerájuin prošeaktajođiheaddjin, lea máŋggaid jagiid jorgalan girjjiid lullisámegillii, ja maiddái bihtánsámegillii ja ubmisámegillii. Dasa lassin leat maŋemus jagiid buvttadan videogirjjiid ja jietnagirjjiid váhnemiid ja earáid sávaldagaid mielde geat leat buktán dieđuid makkár dárbbut sis leat sámi girjjálašvuođa ja giela ektui.

– Trøndelága fylkkagirjeráju bargu jorgalit mánáid- ja nuoraidgirjjiid lullisámegillii lea leamaš áibbas dárbbašlaš dan ektui ahte oažžut eanet girjjálašvuođa lullisámegillii. Lea dehálaš giellaovddideapmái ahte girjjálašvuohta gávdno. Videogirjjit mat maŋemus jagiid leat ráhkaduvvon, leat čájehuvvon leat hui bivnnuhat sihke nuoraid ja rávisolbmuid gaskkas giellaoahpahusa ektui, dadjá Jåma.

Sámediggeráđđi lea maid juolludan 34 000 ruvdnosaš doarjaga Vinterleik lágádussii jorgalit Niillas ja Mággá govvaráiddu davvisámegillii. Ovdal lea almmuhuvvon govvaráidu mas Niillas ja Mággá leaba mielde dárogillii, davvisámegillii, lullisámegillii ja kveanagillii. Govvaráidu lea leamaš bivnnut mánáid gaskkas, ja lea bures márkanastojuvvon. Lea maiddái boahtán teáhterveršuvdna vuosttaš almmuheamis mii čájehuvvo mánnosaččat Kultuvrralaš skuvlalávkkas, ja jearru eanet muitalusaide Niillas ja Mággá birra lea lassánan dan maŋŋel.

– Lea stuorra dárbu ahte mánáide ja nuoraide bohtet dakkár almmuheamit ja govvaráiddut maid lea álki ipmirdit, danne lea buorre go sáhttit addit doarjaga dákkár buriide prošeavttaide, dadjá Jåma.

Sámediggeráđđi juolluda vel 77 440 ruvnno doarjjan Fremstad Paraply fitnodahkii davvisámegielat mánáidgirjji "Få vekk den musa" jorgaleapmái. Girji ilbmá maiddái e-girjin.

– Dat ahte girji, mii galgá jorgaluvvot davvisámegillii, maiddái boahtá e-girjin, lea hui illudahtti, go leat hui unnán e-girjjit sámegillii, dadjá Jåma.

Doarjagat oktiibuot 792 440 ruvnno ovddas leat juolluduvvon doarjjaortnegis Doarjja sámi girjjálašvuođa prošeaktadoarjagii, mas lea rabas ohcanáigemearri juovlamánu 1. beaivvi. Doarjjaortnega mihttomearri lea sámi girjjálašvuohta mii lea olámuttus sámegillii.