Kievra AS lea ohcan doarjaga danne go lea dárbu eanet ođđaáigásaš ja geavatlaš arenaide gos sámegiella sáhttá geavahuvvot aktiivvalaččat árgabeaivvis. Hárjehallama, dearvvašvuođa ja fysalaš aktivitehta birra gávdno unnán digitála sisdoallu davvisámegillii, ja ollu sánit ja dajaldagat mat gullet gorudii, lihkadeapmái, vuoibmái  ja hálddašeapmái leat unnán oidnosis dálá hárjehallan- ja dearvvašvuođareaidduin.

Jon-Christer Mudenia Árvu/Sámediggi

Prošeakta galgá álkidahttit sámegiela geavaheami hárjehallanguovddážis, skuvllas, dearvvašeallinfálaldagas, valáštallansearvvis ja ruovttus.

– Prošeakta sihke nanne sámegiela geavaheami, ráhkada ođđa digitála sisdoalu davvisámegillii ja dahká giela oinnolažžan ođđaáigásaš ja dearvvašvuođa ovddideaddji arenas, dadjá sámediggeráđđi Jon-Christer Mudenia (NSR).

Áigumuš lea ráhkadit vuosttaš veršuvnna applikašuvnnas mas lea hárjehallanbáŋku, hárjehallanprográmmat, govat, video ja jietna davvisámegillii, dárogillii ja eŋgelasgillii.

300 000 ruvdnosaš doarjja addojuvvo doarjjaortnegis Giellaovddidandoaimmat. Doarjjaortnega mihttomearri lea ahte organisašuvnnat dokumenterejit, ovddidit ja addet oahpahusa sámegielas. Okta vuoruheapmi lea ráhkadit sámegielat applikašuvnnaid ja spealuid. 

Doarjjaortnega ohcanáigemearri lea skábmamánu 3. b. 2026 dii. 15.30. Ohcamat meannuduvvojit dađistaga.