Reisa Lodge Ráisávžžis vásiha ahte olbmot ohcalit dieđuid sámi kultuvrra birra guovllus, ja háliida muitališgoahtit sámi kultuvrra ja borramuša birra.

Reisa Lodge oažžu Sámedikkis doarjaga cegget stuora lávu masa čáhket unnimusat 40 guossi, gos sáhttet gaskkustit historjjá ja guossohit sámi borramuša.

– Lean movttet go Reisa Lodge áigu muitališgoahtit sámi kultuvrra ja borramuša birra. Ráisávži lea erenoamáš guovlu gos sáhttá ollu muosáhit, ja dál sáhttá sámi borramuš maid šaddat oassin dan fálaldagas. Mii diehtit ahte ollu mátkkošteaddjit háliidivčče gullat sámi kultuvrra birra, ja mii dárbbašit dakkár fitnodagaid go Reisa Lodge, mat dustet áŋgiruššat. Sii ásahit bargosajiid ja álggahit doaimmaid báikkálaččat, ja seammás ovddidit sámevuođa Ráissas. Mun illudan oaidnit barggu ovdáneami, dadjá politihkalaš ráđđeaddi Sandra Márjá West (NSR).

Doarjja juolluduvvo doarjjaortnega Sámi mátkeealáhusat, hutkás ealáhusat ja sámi borramuš bokte.