Doarjja TIL-prošektii mii galgá eastadit sámevaši Romssas

Doarjja TIL-prošektii mii galgá eastadit sámevaši Romssas

Sámediggeráđđi lea juolludan 260 000 ruvnno Romssa valáštallansearvái (TIL), prošektii RomsaDál, mii galgá eastadit sámevaši Romssas.

Silje Karine MuotkaProšeakta lea kampánja mii galgá oainnusmahttit sámegiela ja sámi kultuvrra Romssa gávpogis, ja veahkkin eastadit sámevaši ja árgabeaiverasismma sámevuođa positiivvalaččat oainnusmahttima bokte. Prošeavtta mihttun lea sámegiela ja sámi kultuvrra oainnusmahttima bokte lávdadit Romssa rámisvuođa sámi gávpogin.

RomsaDál lea vuolgán #doarváidál lihkadusa sámevaši vuostá olis, dahje #noknu mii lea dárogiel veršuvdna, mii almmuhuvvui sosiála mediain loahpageahčen jagi 2020 maŋŋel go máŋggas vásihedje sámevaši Romssas. Kampánja lihkostuvai ja maiddái riikkaviidosaš mediat giddejedje olu fuomášumi dasa.

TIL áigu dán fuomášumi ain viidáseappot hukset ja lávdadit Romssa rámisvuođa sámi gávpogin RomsaDál prošeavtta bokte.

– Árgabeaiverasismma ja vealaheapmi sámiid vuostá lea lassánan maŋemus jagiid ja šaddan stuora hástalussan, erenoamážit nuorra sápmelaččaide, dadjá sámediggeráđđi Silje Karine Muotka (NSR). Son čujuha maiddái sámevaššái mii bohciidii go beana báhččui Álttás gieskat, go daddjo ahte lea oaguhan bohccuid.

– Leat oallugat geat eai hálit coggat gávtti go vulget gávpogii, ja oallugat maiddái vásihit ahte sosiála neahttabáikkit ja neahttaaviissaid kommentárasajit, go leat čállosat sámi áššiid birra, leat noađđin. Danin lea RomsaDál dehálaš prošeakta.

TIL ovttasbargá Romssa suohkaniin Gáisi giellaguovddáža bokte dán prošeavttas, ja maiddái earret eará Romssa valáštallanbiirriin, Sámi váhnenfierpmádagain, Romssa Sámi Servviin, Romssa Noerehiin, Sámi Studeantasearvi Davvi Norggain, Redd barnain ja Rakettnattiin. Lassin lea maiddái prošeavttas dehálaš ulbmilin olahit gávpoga eará aktevrraide ja ealáhuseallimii oažžun dihtii maiddái sin searvat.

Galgá ráhkaduvvot kampánjaprofiila mii adnojuvvo njálmmálaččat, digitálalaččat ja márkanfievrrideamis. Dan designa galgá čielgasit čájehit sámevuođa ja leat searvvaheaddji. Galget maid ráhkaduvvot govat, filmmat ja jietnaprofiillat maid sáhttá atnit valáštallanlágidemiid oktavuođas dahje almmolaš fievrruin.

Doarjja mii lea 260 000 ruvnno lea juolluduvvon regionála ovddideami doarjjaortnegis.

Gažaldagaid ja jearahallama oktavuođas, váldde oktavuođa sámediggeráđiin Silje Karine Muotkain (NSR), mob. +47 984 87 576, silje.karine.muotka@samediggi.no