Návuona suohkan, ollásit eaiggáduvvon suohkanlaš fitnodaga Kvænangen Næringsfabrikk AS bokte, háliida viidáseappot ovdánahttit árbevirolaš Verddečiekčamiid vai šaddá stuorát, jahkásaš Verddefestivála.

Sámedikki mielas lea dát buorre áŋgiruššan, mii sáhttá leat mielde oainnusmahttimin sámi kultuvrra ja sámegiela muđui Návuonas ja Davvi-Romssas. Sámediggi doarju festivála ovddideami 114 000 ruvnnuin vai sáhttá ovdánahttit guhkesáigásaš festiválakonseapta. Doarjja váldo Sámedikki regionála ovddideami ortnegis.

- Mii leat ilus go háliidit viidáseappot ovddidit Verddečiekčamiid Návuonas. Verddečiekčamiin leat guhkes árbevierut ja mii jáhkkit ahte Verddefestivála ođđa konseapta sáhttá lihkostuvvat, dadjá sámediggepresideanta Silje Karine Muotka.

114 000 ruvdnosaš doarjja juolluduvvo doarjjaortnegis Regionála ovddidanprošeavttat.