Leron AS galgá birra jagi bivdit vilgesguoli, dorski, sáiddi ja báldá. Prošeavtta ulbmil lea ásahit fitnodaga gánnáhahtti ja ceavzilis guolásteaddjin Gálssa suohkanis.

– Nissonolbmuid lohku guolástusealáhusas ferte stuorrut, ja danne lea erenoamáš buorre juolludit vuosttaš geardde investerendoarjaga nissonolbmui gii lea guolásteaddji. Dásseárvu guolástusealáhusas guoská midjiide buohkaide. Mun sávan sutnje lihku ja buori guolásteami, dadjá sámediggepresideanta Silje Karine Muotka (NSR).

Sámediggi háliida ahte eanet olbmot álggášedje guolástusealáhussii, ja danne lea Sámedikkis doarjjaortnet mii movttiidahttá háhkat fatnasiid ja ahte eanet olbmot  álggášedje riddolagaš guolástemiin.

Fitnodat áigu maiddái virgádit liige guolásteaddji doibmii, ja erenoamážit deattuhuvvo rekrutteret eará nissoniid guolástussii. Go bálkáha liige olbmo, de dat buorida bevttolašvuođa, sihkarvuođa fatnasis ja lea mielde ráhkadeamen bargosajiid báikkálaš servodahkii.

Doarjja juolluduvvo Doarjja vuođđoealáhusaide doarjjaortnegis. Ohcan gullá Sámedikki jagi 2023 Mariidna ealáhusaid bušeahta ulbmiljovkui ja vuoruhemiide.

Leron AS fitnodat lea Vannvågas, Gálssa suohkanis, mii lea Sámedikki ealáhusovddidandoarjagiid vuođđoguovlu, ja danne lea vejolaš addit doarjaga dán fitnodahkii.