Doarjagat leat addojuvvon mariidnaealáhusaid doarjjaortnega bokte, man ulbmil lea bisuhit ja lasihit barggolašvuođa mariidnaealáhusain mearrasámi guovlluin. Sámediggi vuoruha erenoamážit doaibmabijuid mat nannejit guollevuostáiváldinrusttegiid, vuosttašgearddeinvesteremiid ja nuoraidguolástanprošeavttaid.

Golbma ohcci leat ožžon 50 000 ruvdnosaš doarjaga guhtege nuoraidguolásteapmái. Dat leat Davvesiidda suohkan, Måsøy næring og havn KF ja Álttá suohkan.

Jon-Christer Mudenia Árvu/Sametinget

– Lea dehálaš láhčit dili nu ahte nuorain lea vejolašvuohta oažžut hárjáneami fitnus, ja mii sávvat ahte sii nagodit rekrutteret eanet nuoraid guolásteapmái, dadjá sámediggeráđđi Jon-Christer Mudenia (NSR).

Golbma ohcci ožžo doarjaga vuosttašgearddeinvesteremiidda.

Natalie Marie Vevang Davvenjárgga gielddas oažžu 250 000 ruvnno doarjjan oastit bivdofatnasa. Ohcci háliida bargagoahtit guolásteaddjin, ja lea ožžon doarjaga oastit guolástanfatnasa Nagabuen.

Stig-Morten Paulsen AS Deanus oažžu 241 000 ruvdnosaš doarjaga oastit guolástanfatnasa. Ohcci galgá bivdit vuonas rabas joavkkus, vuosttažettiin dorski ja reabbá.

Halonen fiske Deanus oažžu 185 000 ruvdnosaš doarjaga álgit guolásteaddjin, oastit fatnasa ja reaidduid vai beassá álgit guolástit.

– Mun lean ilus go eambbogat áigot bargagoahtit guolástemiin. Go ráhkada alcces bargosaji, de lea maid mielde bisuheamen ja ovddideamen báikkálaš riddoservodaga, dadjá Mudenia.

Doarjjaortnet mariidnaealáhusaide lea rabas ohcciide gitta skábmamánu 3. beaivái 2026 dii. 15.30. Ohcamat meannuduvvojit dađistaga.

Dát leat ožžon doarjaga: