Buolvas Buolvaj lea ohcan ja ožžon doarjaga lágidit julevsámi giella- ja kulturlávguma Sámi Safari Campas, mii lea Lávrras Hábmera suohkanis. Doppe galget oasseváldit njeallje intensiiva beaivvi lávgut julevsámi gielas ja kultuvrras. Biepmu, duoji ja muitaleami bokte galgá sin sámi iešdovdu nannejuvvot, mii fas galgá addit buoret iešluohttámuša geavahit giela ja kultuvrralaš gálggaid. Kultuvrralaš oadjebasvuohta ja identitehta lea lihkostuvvanfáktor giellaoahpahusas dán guovllus.

Prošeavtta oktavuođas lea ulbmil addit oasseváldiide gálggaid, motivašuvnna ja inspirašuvnna geavahit sámegiela aktiivvalaččat árgabeaivvis ja kurssas lea mihttu stuoridit oasseváldiid sátneriggodaga.

Ulbmiljoavku leat nuorat ja rávisolbmot geat háliidit hukset julevsámi giellamáhtu ja kultuvrralaš gelbbolašvuođa mii lea čadnon iežaset fulkkiide ja historjái.

– Sámediggi atná dehálažžan ahte nuorat ja maid rávisolbmot besset oahppat julevsámegiela dán vuogi mielde. Julevsámegiella lea áitojuvvon giella, mii dárbbaša dákkár giellaoahppanfálaldagaid. Oallugiin lea passiiva giellamáhttu ja dárbbašit oadjebas rámmaid siskkobealde geavahišgoahtit giela, dadjá sámediggeráđđi Mikkel Eskil Mikkelsen (NSR).

Doarjja addo doarjjaortnegis Sierra gielladoaimmat lulli-, ubmi-, bihtán-, julev-, nuortalaš ja márkosámi guovlluide.