Evttohusas meannuduvvo dál energiija- ja biraslávdegottis, ja das lea áigumuš čielggasmahttit lágaid nu ahte dat olbmot geain čielgasit lea heahtegádjundahku, eai galgga ráŋggáštuvvot.

Dálá láhkaásaheapmi lea eahpečielggas, ja Sámediggi lea ovdal čujuhan ahte rievdadusat 2020:s sátnehámiin "galgá adnojuvvot dárbbašlažžan" leat gáržžidan vejolašvuođa báhčit boraspiriid heahtegádjuma oktavuođas. Dát lea dagahan ahte olbmot leat ráŋggáštuvvon vaikko leat heahtedilis suddjen omiid, bohccuid ja eará šibihiid.

– Lea mearrideaddji ahte mii oažžut sadjái heahtegádjunmearrádusa mii lea čielggas, iige bija ovttaskas olbmuid dakkár dillái ahte risikerejit ráŋggáštuvvot dárbbašlaš daguid ovddas. Dávjá ferte moatti sekunddas dahkat mearrádusa dákkár dilálašvuođain, dadjá sámediggeráđđi Elisabeth Erke.

Son deattuha maid ahte sámi guođohanealáhus lea oassin sámi kultuvrras ja nu suodjaluvvo ON konvenšuvnnas siviila ja politihkalaš vuoigatvuođaid birra, ja dan fertejit sihke láhkaásaheaddjit ja duopmostuolut váldit vuhtii.

Erke mielas lea buorre go measta buot bellodagat Stuorradikkis leat dorjon láhkarievdadusa.

– Riektestáhtas Norggas ii sáhte leat nu ahte leat eahpečielga riektenjuolggadusat, ja mii vuordit dárbbašlaš rievdadusaid, loahpaha Erke.