Doarjja addojuvvo doarjjaortnegis Máŋggabealálaš ealáhusat, ja galgá váikkuhit ođđahutkamii ja fitnodatovddideapmái. Ortnega ulbmil leat gánnáhahtti fitnodagat mat váikkuhit sámi báikegottiide.

Diibmá oaččui Magga doarjaga plastihkkasveisema álggaheapmái ja geahččalanbuvttadeapmái. Dan rájes lea doaibma ásahan nanu kunddarvuođu boazodoalloealáhusas. Buktagat vuvdojuvvojit báikkálaččat Finnmárkkus, Romssas ja Nordlánddas, ja maiddái eará ealáhusaide ja priváhta olbmuide.

Buktagiid jearru lea lassánan, ja dálá buvttadanbáiki ráddje doaimma viidáset ovdáneami. Ođđa buvttadanbáikkis oažžu Magga buoret buvttadankapasitehta, vejolašvuođa bargat eanet prošeavttaiguin oktanaga ja heivvolaš saji gos kundarat sáhttet oaidnit buktagiid.

Jon-Christer Mudenia Árvu/Sámediggi

Sámediggeráđđi Jon-Christer Mudenia (NSR) dadjá ahte prošeakta váikkuha eanet árvoháhkamii ja barggaheapmái boazodoalus ja dan birrasis.

– Sámediggeráđđi árvvoštallá prošeavtta buorren ovdamearkan báikkálaš fitnodatovddideapmái. Fitnodat lea juo ásahan iežas buktagiidda márkana, ja ođđa buvttadanbáiki láhčá dilálašvuođa viidáset ahtanuššamii, buvttadankapasitehta lasiheapmái ja stuorát árvoháhkamii báikegottis, dadjá Mudenia.

Ohcanáigemearri doarjjaortnegii Máŋggabealálaš ealáhusat lea skábmamánu 3. b. 2026 dii. 15.30. Ohcamat meannuduvvojit dađistaga.