Fitnodat oažžu Máŋggabealálaš ealáhusaid doarjjaortnega bokte 327 000 ruvnno hukset ođđaáigásaš hotealla. Prošeavttas galgá huksejuvvot hotealla mas leat duppallanjat, stuora lanjat (suite) ja lásebarttat (glassiglo). Galget maid fállojuvvot ollu doaimmat, nugo muohtaskohteriiguin vuodjit, elsihkkeliiguin sihkkelastit ja eará kulturvuđot vásáhusat. 

Paul Bendikk Jåma Árvu/Sámediggi

– Beroštupmi mátkeealáhusvásáhusaide Davvi-Romssas orru lassáneame, earret eará lassánan turisttaid dihte Romsii. Buoret idjadanfálaldagat Birtaváris sáhttet váikkuhit dasa ahte báiki geasuha eanet gussiid, ja nu maiddái leat ávkin báikkálaš árvohuksemii, dadjá sámediggeráđđi Paul Bendikk Jåma (NSR). 

Sámi mátkeealáhusaid, hutkkálaš ealáhusaid ja sámi borramuša doarjjaortnega bokte oažžu fitnodat vel 172 000 ruvnno doarjjan ovddidit visuála identitehta ja ruovttusiiddu fitnodahkii. Dain galgá leat sámi ja báikkálaš profiila, ja dat galget čájehit fitnodaga konseaptta ja árvvuid. 

– Dát initiatiiva ovttastahttá guoddevašvuođa, báikkálaš kultuvrra ja ealáhusovddideami. Birtavarre Aurora Adventures lea gelddolaš konseapta mii sáhttá nannet sámi mátkeealáhusa ja buktit ođđa bargosajiid guvlui, loahpaha sámediggeráđđi Jåma.