Buot dat čuođi oahppi Návuona mánáid- ja nuoraidskuvllas galget oahppat árbevirolaš boazodoalu ja dan mearkkašumi birra ealáhussan. Sii galget maid oažžut máhtu bohccuid birra, daid láhttema, eallinvuogi ja bohcco mearkkašumi birra sámi kultuvrras.

Ulbmil lea earret eará ásahit buori oktavuođa báikkálaš olbmuid gaskkas, mas oahppit besset oahpásmuvvat boazodollui báikkálaš fitnodahkan ja ealáhussan.

– Mun lean ilus dan áŋgiruššama dihte maid skuvla čájeha, go háliida buoridit máhtolašvuođa sámi boazodoalu birra skuvllas. Seammás addá prošeakta ohppiide eanet máhtu ja ipmárdusa dán ealáhusa birra mii lea deaŧalaš oassi Návuonas, dadjá sámediggeráđđi Berit Marie P. E. Eira (JSL).

Dápmat ja vuodjit herggiiguin lea máhtolašvuohta mii geavahuvvui hui ollu ovdalaš áiggiid go olbmot geavahedje herggiid fievrredit olbmuid dahje dávviriid ovtta báikkis nubbái. Muhto ođđa áiggis dát geavahus lea oalát jávkan beaktileappot fievrruid geažil, nugo ovdamearkka dihte skohteriid. Oahppit galget prošeavttas beassat oahppat dán erenoamáš árbevirolaš sámi máhtu birra.

Oahppit galget maid oahppat árbevirolaš biebmoráhkadanvugiid.

– Oahppit ožžot vejolašvuođa oahppat báikkálaš sámi árbedieđuid praktihkalaš bargguid bokte. Dákkár prošeavttat leat dehálaččat oahpahusas, dadjá Eira.