Paul Bendikk Jåma Árvu/Sámediggi

– Suodjalus ferte oahpahit olbmuid doppe gos Suodjalus duođaid galgá doaibmat. Go measta buot militeara oahppu lea lulde, seammás go stuorámus operatiiva fámut leat davvin, de dat dagaha dássehisvuođa ja hedjonahttá sihke gearggusvuođa ja ásaiduvvama, dadjá sámediggeráđđi Paul Bendikk Jåma (NSR).

Ođđa raporta maid Suodjalusa dutkaninstituhta (FFI) ja NORCE leat almmuhan čájeha ahte gitta 40 proseantta Davvi-Norgga suodjalusbargiin johtet bargui Lulli-Norggas. Sámediggeráđđi oaivvilda ahte dát deattuha dárbbu ahte čielga nationála gelbbolašvuođahuksen ja rekrutteren davvin vuoruhuvvo.

– Suodjalusoahpuin davvin berre vuođđun leat sámi giella- ja kulturgelbbolašvuohta. Máhtolašvuohta báikkálaš diliid birra, luonddu ja árbevirolaš guovlogeavaheami birra lea dakkár givrodat mii sáhttá addit Suodjalussii buoret doaibmannávccaid ja gearggusvuođa davvin, oaivvilda Jåma.

Sámediggeráđđi sávvá lihku Leavnnja joatkkaskuvlii go sis lea dohkkehuvvon ođđa studerenráhkkanahtti prográmma suodjalusas ja gearggusvuođas, mii lea vuosttaš dán lágan surggiin riikkas. 

– Dát lea deaŧalaš lávki suodjalusgelbbolašvuođa buorideamis davvin. Dát lea boahtteáigái ráhkkanahtti ja strategalaččat deaŧalaš fálaldat mii addá Sámi ja Davvi-Norgga nuoraide ođđa vejolašvuođaid. Dat nanne sihke báikkálaš servodatovdáneami ja nationála suodjalannávccaid, dadjá Jåma.

Jåma čujuha dasa ahte suodjalusoahpuid viidáset ovddideapmi davvin ferte dáhpáhuvvat lagas ovttasbarggus Suodjalusa, riikkaoasi oahppoásahusaid ja regionála eiseválddiid gaskka. 

– Gearggusvuođas lea sáhka luohttámušas, kulturipmárdusas ja leahkimis. Davvin mis leat vásáhusat, gelbbolašvuohta ja dáhttu searvat. Danne ferte Suodjalus geahččat davás, ii dušše doaibmaguovlun, muhto báikin gos hukset boahtteáiggi, dadjá sámediggeráđđi Jåma.