Dál leat 19 sámi giellaguovddáža mat ožžot doarjaga Sámedikkis, muhto ii oktage dain bargga ubmisámegielain. Ođđa ubmisámi giellaguovddáža ásaheapmi galgá leat mielde ealáskahttimin ja nannemin ubmisámi giela ja kultuvrra, ja lea dehálaš doaibmabidju sihkkarastit gielalaš valljivuođa ja kultuvrralaš nanuvuođa Sámis.
– Ubmisámegiella lea leamaš garrasit marginaliserejuvvon, ja lea stuorra dárbu ulbmillaš doaibmabijuide. Giellaguovddáža ásaheapmi lea dehálaš lávki ubmisámegiela ja kultuvrra oainnusmahttimis ja viidáset ovddideamis, dadjá sámediggeráđđi Maren Benedicte Nystad Storslett (NSR).
Ruđat leat juolluduvvon ohcanvuđot Giellaovddidandoaimmat-doarjjaortnega bokte, mas okta vuoruhemiin lea giellaguovddáš mii lea ásahandásis.
Ođđa ubmisámi giellaguovddáš galgá hukset viidáseappot dan bargui mii lea dahkkon Heäjmmanássjas (Hemnes) ja Raanes (Rana), earret eará ovddidit álkis ubmisámi giellaoahppagirjji ja ovttasbargat ubmisámi sátnegirjji almmuheamis.
Guovddáš lea ohcamis Sámediggái cealkán ahte sii áigot fállat giellakurssaid, ovddidit oahpponeavvuid, ja nannet digitála resurssaid giellaoahpahussii. Áigumuš lea maiddái ovttasbargat giellabirrasiiguin ja fágaolbmuiguin Ruoŧa bealde.
Sámediggeráđđi illuda čuovvut giellaguovddáža ovddideami ja dan deaŧalaš barggu mii dahkko gáhtten ja nannen dihtii ubmisámegiela.
– Giellaguovddážat leat deaŧalaččat, dat leat sámi báikegottiid váimmut. Dat leat ealli deaivvadanbáikkit gos giella lea guovddážis. Mánočalbmi-julggaštusa mielde leat giellaguovddážat strategalaš áŋgiruššan Sámediggái, ja čoavdda barggus sihkkarastit gielalaš vuoiggalašvuođa ja máŋggabealatvuođa Sámis, lohká Nystad Storslett.
OŽŽON DOARJAGA: Sámediggeráđđi Maren Benedicte Nystad Storslett galledii miessemánus Upmisámi Giella- ja Resursaguovddáža Heäjmmanássjas (Hemnesberget). Govas: Markus Langseth, Harald Horgen, Jon Arne Jacobsen, Arnt Ivar Lillevik, Trond Rydsaa, Gudridur Valva Gisladottir, Maren Benedicte Nystad Storslett, Anne Grete Langseth, Trine Lise Bang-Hulstad, Inga Merete Pulk, Laila Wilks, Jørn Magnus Langseth