Silje Karine Muotka Åse M. P. Pulk, Sámediggi

- Lea áibbas dohkketmeahttun go ráđđehus almmuha Muolkkuid elektrifiserema dáinna lágiin. Dákkár mearrádus čájeha ahte ráđđehus duvdá eret buot lohpádusaid vuhtiiváldit sámi vuoigatvuođalaččaid. Lohpádus nannet gulahallama Sámedikkiin orrot maiddái leamen guoros sánit, dadjá sámediggepresideanta Silje Karine Muotka (NSR).

Sámediggeráđđi oaivvilda ahte ráđđehus ii beroš das ahte dá leat billisteaddji luondduduohtadeamit, ii ge leat oahppan ovddit boasttuvuođain mat leat dagahan olmmošvuoigatvuođarihkkuma mii dál dáhpáhuvvá Fosenis. Ráđđehus váldá hui stuorra riskkaid go guoská sámi vuoigatvuođalaččaid gierdanráji rihkkuma ON konvenšuvnna siviila ja politihkalaš vuoigatvuođaid ektui art. 27. 

- Mun lean hirpmástuvvan go biehttaluvvo geahččat ášši ollislaččat daid hirbmat stuora váikkuhusaid ektui maid dat dagaha sámi kultuvrra luondduvuđđosii olles regiovnnas. Ráđđehus lea duođaid čalmmehuvvan, deattuha Muotka.

Maja Kristine Jåma Sámediggi

Sámediggeráđđi lea hui fuolastuvvan Hámmárfeasta LNG elektrifiserema negatiiva váikkuhusain ja váikkuhusain, ja lea gáibidan konsultašuvnnaid áššis. Čoahkkimis stáhtačálliin Elisabeth Sæther:in geassemánu 28. b. soabaimet ahte Oljo- ja energiijadepartemeanta áigu árvvoštallat čálalaččat konsultašuvdnageatnegasvuođa. Dát árvvoštallan ii gávdno.

- Dát laktása vuot beahtahallamii ráđđehusa eahperehálaš doaimmaide energiijapolitihkas. Finnmárkku luondu ja sámi kultuvra lea vuoittahallin go ráđđehus dál orro válljemin fitnodatekonomálaččat hálbbimus čovdosa Equinor:ii, dadjá Sámediggeráđđi Maja Kristine Jåma (NSR).