Jon-Christer Mudenia

Evttohuvvo unnidit fanaseriid dan dihte go riddoguolástusortnegii servet dál eambbo fatnasat. Ortnegis leat badjel 1100 fatnasa ja das leat mielde eanas guolásteaddjit sámi vuotna- ja riddoguovlluin. Dorski lea deháleamos guollešládja, ja dat dahká sullii 70-90 proseantta dietnasis, jus ii rehkenastte mielde reabbábivddu. 

– Alit earit obbalaččat sáhttet dagahit ahte hattit njidjet. Sámediggi ii sáhte dohkkehit ahte sámi guovlluid guolásteaddjit ožžon unnit eriid ja dasto maiddái unnit dietnasa boahtte jagi, dadjá sámediggeráđđi Jon-Christer Mudenia (NSR). 

Sámediggi lea konsultašuvnnain Guolástusdirektoráhtain evttohan riddoguolástusortnega lasihit 3000 tonnas 4000 tonnii 2027:s. Dasa ii mieđa Guolástusdirektoráhtta. 

– Sámediggi áigu konsultašuvnnain departemeanttain loktet ášši riddoguolástuseari sturrodaga birra. Jagi 2011 rájes lea riddoguolástusearri leamaš 3000 tonna. Vuosttaš jagiid ledje gaskal 100 ja 200 fatnasa mielde ortnegis. Diehttelasat ferte eari lasihit dál go leat badjel 1100 fatnasa mielde ortnegis, dadjá Mudenia. 

Oassálastilága paragráfa 21 mielde lea sámi guolástanvuoigatvuođaguovlluid guolásteddjiin, geat leat guolásteddjiidlogahallamis ja geain lea fanas oanehit go 11 mehtera, riekti guolástit. Láhkaevttohusas čadnojuvvo riddoguolástusearri dán riektái. 

– Guolástanriekti oassálastilága mielde raššu jus dasa ii leat maid čadnon doarvái earrevuođđu. Go fanasearit unnot, de lea maid bahá ahte guolásteddjiin unnu dienas. Dalle gal mu mielas eiseválddit hástalit mearraresursalága paragráfa 7 g, mii geatnegahttá stáhta sihkkarastit sámi kultuvrii ávnnaslaš vuođu, dadjá Mudenia.