Runar Myrnes Balto ja Jan Christian Vestre Lisbeth Eira, Sámediggi

– Sámediggi lea guhká vuordán dán čielggadusa, ja mun háliidan giitit dearvvašvuođa- ja fuolahusministara Jan Christian Vestre go lea vuoruhan ášši. Sámediggi lea konsulterejuvvon ja ollislaččat lea ovttamielalašvuohta sihke das mii galgá čielggaduvvot ja gii galgá leat lávdegottis, dadjá sámediggeráđđi Runar Myrnes Balto (NSR).

Lávdegoddi galgá earret eará árvvoštallat leat go dálá dearvvašvuođabálvalusat sápmelaččaid vuoigatvuođaid siskkobealde ILO-konvenšuvnna 169 mielde. Dat galgá evttohit dárbbašlaš doaibmabijuid maiguin sihkkarastit dásseárvosaš dearvvašvuođafálaldaga sámi buhcciide miehtá Norgga, ja guovddáš oassi lávdegotti barggus lea árvvoštallat Sámi klinihka organiserema.

Lávdegottis galget leat fágaolbmot geain lea viiddis gelbbolašvuohta dearvvašvuođas, sámi dilálašvuođain ja olmmošvuoigatvuođain, ja bargu galgá čađahuvvot lagas gulahallamis relevánta sámi aktevrraiguin ja birrasiiguin.

– Mii leat ožžon buriid sámi fágaolbmuid mielde lávdegoddái, ja dat lea buorre. Dál leat Sámedikkis stuorra vuordámušat dasa ahte evttohuvvo čoavddus mii sihkkarastá Sámi klinihkkii boahtteáiggi sámi álgoálbmotdearvvašvuođaguovddážin, ja ahte sámi dearvvašvuođafálaldagat loktejuvvojit olles spesialistadearvvašvuođabálvalusas, dadjá sámediggeráđđi Runar Myrnes Balto loahpas.

Loga eanet áššedovdilávdegotti birra ráđđehusa neahttabáikkis